రాష్ట్రంలో ఆరోగ్య ఆత్యయిక స్థితిలో భాగంగా ప్రభుత్వం ముందస్తు చర్యలు చేపడుతుంటే... ఆదిలాబాద్ జిల్లాలోని ప్రభుత్వ రిమ్స్ వైద్యకళాశాలలో భిన్నమైన పరిస్థితి నెలకొంది. రిమ్స్ వైద్యకళాశాలలో మొత్తం 153 వైద్య పోస్టులకుగాను దాదాపుగా 50 పోస్టులు ఏళ్ల తరబడి భర్తీకి నోచుకోవడంలేదు. ఫలితంగా వివిధ రకాల రుగ్మతలతో ఆసుపత్రికి వస్తోన్న వ్యాధిగ్రస్థులు ప్రైవేటు ఆసుపత్రిని ఆశ్రయించాల్సి వస్తోంది. దీనికి తోడు మందుల కొరత తీవ్రంగా ఉందని రోగులు వాపోతున్నారు.
ఏ రోగమైనా.. జ్వరం మాత్రే..
రిమ్స్ అన్ని విభాగాల్లో కలిపి 500 పడకలుంటే.. వారం రోజుల కిందట కరోనా నియంత్రణలో భాగంగా మరో 20 పడకలతో ఐసోలేటెడ్ వార్డును ఏర్పాటు చేశారు. సగటున ప్రతిరోజు 1300 వరకు రోగులు ఇక్కడికు వస్తుంటారు. అటు ఇన్‌ పేషంట్లకు, ఇటు ఔట్‌ పేషంట్లకు ఆసుపత్రిలో సరిపడా మందుల సరఫరా లేక విమర్శలను ఎదుర్కోవాల్సి వస్తోంది. తాజాగా జ్వరం, జలుబు, దగ్గు, ఒళ్లునొప్పులు, కంటి దురదతో వ్యాధిగ్రస్థులు అధికసంఖ్యలో వస్తుంటే సరిపడ మందులు అందుబాటులో లేవని ప్రజలు ఆరోపిస్తున్నారు. వ్యాధి ఏదైనా జ్వరం మాత్రలతో పాటు ఒకటి రెండు రకాలైన యాంటీబయాటిక్స్‌ మందులే ఇస్తూ మిగతావాటికి బయటకు చీటి రాస్తున్నారని ఆవేదన వ్యక్తం చేస్తున్నారు.
మందులు లేవని అంగీకరించిన వైద్యాధికారి
ఇదే అదునుగా భావించిన కొంత మంది వైద్యులు తమ ప్రైవేటు ఆస్పత్రుల్లో లభించే మందులనే రాసివ్వడం అనేక ఆరోపణలకు తావిస్తోంది. రిమ్స్లో మందుల కొరత ఏర్పడినట్లు తమ దృష్టికి వచ్చిందని అంగీకరించిన వైద్యారోగ్యశాఖాధికారి.. బయటకు చీటి రాయకుండా చర్యలు తీసుకుంటామని పేర్కొనడం అనేక అనుమానాలకు దారితీస్తోంది.
పూర్వ ఆదిలాబాద్ జిల్లాతో పాటు పక్కన ఉన్న మహారాష్ట్ర పరిసర ప్రాంతాలకు ఆరోగ్య సంజీవనిగా ఉన్న రిమ్స్ వైద్యకళాశాలలో నెలకొన్ని సమస్యలను అధికారులు గుర్తించి సరిచేయనట్లయితే పరిస్థితి మరింత దిగజారే అవకాశం ఉందని ప్రజలు అంటున్నారు.
ఇవీ చూడండి: రాష్ట్రంలో నాలుగుకు చేరిన కరోనా కేసులు
