గ్రామాల్లో పల్లె ప్రగతి పనులతో పాటు రైతు వేదిక నిర్మాణాలను వేగంగా పూర్తిచేయాలని ఆదిలాబాద్ జిల్లా పాలనాధికారి సిక్తా పట్నాయక్ పేర్కొన్నారు. జిల్లాలోని ఉట్నూర్ మండలం శ్యాంపూర్, తాండ్ర, లక్కారం గ్రామాల్లో ఆమె పర్యటించారు. తాండ్ర గ్రామంలో చేపట్టిన ప్రకృతి వనాన్ని ప్రారంభించి మొక్కలు నాటారు. అనంతరం లక్కారం గ్రామ పంచాయతీలో డంపింగ్ యార్డ్ పనులను పరిశీలించారు. పనులు పూర్తైన వెంటనే ప్రారంభించాలని సూచించారు.
లక్కారం సర్పంచ్ జనార్ధన్ స్మశాన వాటిక నిర్మాణానికి స్థలం లేక ఇబ్బందులు పడుతున్నామని కలెక్టర్కు విన్నవించారు. వెంటనే స్థానిక తహసీల్దార్ ఎంపీడీవోతో మాట్లాడి ప్రభుత్వ భూమిని చూసి వారికి కేటాయించాలని ఆదేశించారు. అనంతరం గ్రామాభివృద్ధి గురించి అడిగి తెలుసుకున్నారు. ఉట్నూర్ మండలంలో చేపడుతున్న పల్లె ప్రగతి, రైతు వేదిక నిర్మాణ పనుల గురించి అధికారులను అడిగి తెలుసుకున్నారు.
ఇవీ చూడండి: రైతుల పాలిట శాపంగా మారిన ఫీడర్‌ ఛానల్‌ కాలువ
