కరోనా కారణంగా స్టార్ టెన్నిస్ ఆటగాళ్లు ఫెదరర్, నాదల్తో పాటు డొమినిక్ థీమ్ టోక్యో ఒలింపిక్స్లో ఆడబోమంటూ స్పష్టం చేశారు. కానీ పురుషుల నెంబర్వన్ ఆటగాడు నొవాక్ జకోవిచ్ మాత్రం తాను పాల్గొంటానని తెలిపాడు. దీంతో ఈసారి స్వర్ణం అతడికే అని అంతా అనుకున్నారు. గ్రూప్ మ్యాచ్ల్లో జకో ఆధిపత్యం చూసినవారికి కూడా అదే అనిపించింది. కానీ నాకౌట్ మ్యాచ్లకు వచ్చేసరికి అంతా తారుమారైంది.
పతకం లేకుండానే!
ఈసారి ఒలింపిక్స్తో పాటు యూఎస్ ఓపెన్ గెలిచి గోల్డెన్ స్లామ్ రికార్డు దక్కించుకుందామన్న జకోవిచ్ ఆశ నెరవేరలేదు. టోక్యో విశ్వక్రీడల్లో సెమీ ఫైనల్ మ్యాచ్లో జ్వెరెవ్ చేతిలో ఓటమి పాలయ్యాడు జకో. దీంతో అతడి స్వర్ణం ఆశలు ఆవిరయ్యాయి. కనీసం కాంస్యం అయినా వస్తుందనుకుంటే అదీ లేదు. నేడు (శనివారం) కాంస్య పతకం కోసం పాబ్లో కారెన్నో బూస్టాతో జరిగిన మ్యాచ్లోనూ ఓటమి చెందాడు. దాదాపు రెండు గంటల 45 నిమిషాల పాటు జరిగిన ఈ మ్యాచ్లో జకో 4-6, 8-6, 3-6 తేడాతో పరాజయం చెందాడు. అంతకుముందు, జకోవిచ్-నినా స్టాంకోవిచ్ జోడీ మిక్స్ డ్ డబుల్స్ కాంస్యం పోరు నుంచి గాయం కారణంగా తప్పుకొంది. దీంతో రిక్తహస్తాలతో ఒలింపిక్స్ నుంచి తిరుగు ముఖం పట్టాడీ స్టార్ ప్లేయర్.
ఇటీవలే తన ఆరో వింబుల్డన్ టైటిల్ గెలిచిన జకో.. కెరీర్లో 20 గ్లాండ్స్లామ్లతో స్విస్ దిగ్గజం ఫెదరర్, నాదల్ సరసన చేరాడు. ఈ సీజన్లో ఇప్పటికే ఆస్ట్రేలియన్ ఓపెన్, ఫ్రెంచ్ ఓపెన్, వింబుల్డన్ దక్కించుకున్న సెర్బియన్ స్టార్.. ఒలింపిక్స్లోనూ స్వర్ణమే లక్ష్యంగా బరిలో దిగాడు. కానీ నిరాశగా వెనుదిరిగాడు.
