ఒలింపిక్స్లో గురువారం.. భారత్ జోరు చూపించింది. అన్ని క్రీడల్లో ఆటగాళ్లు మెరుగైన ప్రదర్శన చేశారు. హాకీ పూల్-ఏ లో మెరుగైన స్థానంతో టీమ్ ఇండియా క్వార్టర్ ఫైనల్ బెర్తు దాదాపు ఖాయం చేసుకుంది. బ్యాడ్మింటన్లో పీవీ సింధు, బాక్సింగ్లో సతీశ్ కుమార్ క్వార్టర్స్కు చేరారు. ఆర్చరీలో పురుషుల వ్యక్తిగత విభాగంలో అతాను దాస్.. ప్రీక్వార్టర్స్ చేరాడు. షూటింగ్ మహిళల 25 మీ. పిస్టల్ విభాగంలో తొలి క్వాలిఫికేషన్ ప్రెసిషన్ రౌండ్లో మను బాకర్ ఐదో(5వ) స్థానంలో నిలిచింది. మరో షూటర్.. రహి సర్నోబత్ 25వ స్థానంలో ఉంది. వీరు శుక్రవారం జరిగే ర్యాపిడ్ ఫైర్లోనూ (క్వాలిఫికేషన్-స్టేజీ 2) తలపడాల్సి ఉంటుంది.
మొత్తంగా టాప్-8లో నిలిచిన షూటర్లు.. మెడల్ రౌండ్కు అర్హత సాధిస్తారు.
సింధుతో మొదలు..
గురువారం.. భారత్ దూకుడు షట్లర్ పీవీ సింధుతోనే ప్రారంభమైంది. ఈ ఒలింపిక్స్లో స్వర్ణపతకంపై గురిపెట్టిన స్టార్ షట్లర్.. క్వార్టర్ ఫైనల్లోకి ప్రవేశించింది. గురువారం జరిగిన ప్రీక్వార్టర్స్లో డెన్మార్క్ క్రీడాకారిణి మియా బ్లిక్ఫెల్ట్ను వరుస సెట్లలో చిత్తు చేసింది.
మ్యాచ్ ఆద్యంతం దూకుడు ప్రదర్శించిన సింధు.. 21-15, 21-13 తేడాతో గెలిచింది. క్వార్టర్స్లో సింధు.. జపాన్ షట్లర్ అకానె యమగూచితో ఆడనుంది.
హాకీలో జోరు..
హాకీలోనూ భారత్ జోరు కొనసాగిస్తోంది. గురువారం జరిగిన మ్యాచ్లో డిఫెండింగ్ ఛాంపియన్ అర్జెంటీనాను 3-1 తేడాతో చిత్తుగా ఓడించింది. దీంతో మెన్ ఇన్ బ్లూకు క్వార్టర్ ఫైనల్ బెర్తు దాదాపు ఖాయమైనట్లే.
పూల్ ఏలోని ఆరింట్లో.. నాలుగు జట్లు క్వార్టర్స్కు చేరుతాయి. ప్రస్తుతం 3 మ్యాచ్లు గెలిచిన టీమ్ ఇండియా.. ఆస్ట్రేలియా తర్వాత రెండో స్థానంలో ఉంది.
చివరి మ్యాచ్ను జపాన్తో ఆడనుంది మన్ప్రీత్ సేన.
చివరి 2 నిమిషాల్లో 2 గోల్స్..
తొలి రెండు క్వార్టర్స్ గోల్స్ లేకుండానే ముగిసింది. మూడో క్వార్టర్లో 43వ నిమిషంలో కుమార్ వరుణ్ భారత్కు తొలి గోల్ అందించాడు. వివేక్ సాగర్ ప్రసాద్(58వ), హర్మన్ ప్రీత్ సింగ్(59వ) నిమిషాల్లో గోల్స్ చేసి భారత్ ఆధిపత్యాన్ని 3-1కి పెంచారు. అర్జెంటీనాకు ఏకైక గోల్ 48వ నిమిషంలో.. పెనాల్టీ కార్నర్ రూపంలో వచ్చింది.
ఇదీ చూడండి: Olympics: కొలనులో కొత్త చేప
ఛాంపియన్కు షాక్ ఇచ్చిన అతాను..
భారత ఆర్చర్ అతాను దాస్.. పురుషుల వ్యక్తిగత విభాగంలో ప్రీక్వార్టర్స్కు దూసుకెళ్లాడు. 1/32 ఎలిమినేషన్స్లో చైనీస్ తైపీకి చెందిన డెంగ్ యు- చెంగ్ను 6-4 తేడాతో ఓడించిన అతాను.. తర్వాతి మ్యాచ్లో దక్షిణ కొరియా టాప్ ప్లేయర్ ఓ జిన్ హయక్పై షూట్-ఆఫ్లో నెగ్గి ప్రీక్వార్టర్స్లోకి ప్రవేశించాడు.
తర్వాతి మ్యాచ్లో జపాన్కు చెందిన ఫురుకవా తకహరూతో పోటీ పడనున్నాడు అతాను.
ఓ జిన్.. రెండు సార్లు ఒలింపిక్ ఛాంపియన్ కావడం విశేషం.
ఈ మ్యాచ్ ఆద్యతం హోరాహోరీగా సాగింది. తొలి సెట్ ఓ జిన్ నెగ్గి 2 పాయింట్లు సాధించాడు. తర్వాతి రెండు సెట్లు టై అవ్వగా.. జిన్ 4, అతాను 2 పాయింట్లతో నిలిచారు. తర్వాతి సెట్ అతాను నెగ్గగా 4-4తో స్కోరు సమమైంది. మళ్లీ ఐదో సెట్ టై అయింది. 5-5తో నిలిచారు. షూట్-ఆఫ్లో ఓ జిన్ 9 స్కోరు చేయగా.. అతాను బాణం గురి తప్పలేదు. 10 పాయింట్లు సాధించి.. మ్యాచ్ గెలిచాడు.
బాక్సింగ్ క్వార్టర్స్లో సతీశ్..
ఒలింపిక్స్లో బాక్సింగ్లో భారత ప్లేయర్లు మెరుగైన ప్రదర్శన చేస్తున్నారు. ఇప్పటికే తమ తమ విభాగాల్లో పూజారాణి క్వార్టర్స్, మేరీకోమ్ ప్రీక్వార్టర్స్లోకి ప్రవేశించగా.. ఇప్పుడు పురుషుల సూపర్ హెవీ (91 కేజీలు+) విభాగంలో సతీశ్ కుమార్ నాకౌట్కు చేరాడు. జమైకాకు చెందిన రికర్డో బ్రౌన్ను 4-1 తేడాతో ఓడించాడు సతీశ్.
ఆగస్టు 1న జరిగే క్వార్టర్ ఫైనల్లో ఉజ్బెకిస్థాన్ బాక్సర్, టాప్ సీడ్ జలలోవ్తో అమీతుమీ తేల్చుకోనున్నాడు.
మళ్లీ మను ఆశలు..
షూటింగ్ మహిళల 25. మీ. పిస్టల్ విభాగంలో మను బాకర్.. ఆకట్టుకునే ప్రదర్శన చేసింది. క్వాలిఫికేషన్ ప్రెసిషన్ రౌండ్లో ఐదో స్థానంలో నిలిచింది. మొత్తం 300 పాయింట్లకు.. 292 సాధించింది.
మరో షూటర్ రహీ సర్నోబత్.. 30 షాట్లకు 287 పాయింట్లతో 25వ స్థానంలో ఉంది.
శుక్రవారం.. క్వాలిఫికేషన్ ర్యాపిడ్ ఫైర్ రౌండ్ జరగనుంది. మొత్తంగా టాప్-8లో నిలిచిన షూటర్లు ఫైనల్కు అర్హత సాధిస్తారు.
ఇవీ చూడండి: IND Vs SL : ఉత్కంఠ పోరులో శ్రీలంక విజయం.. సిరీస్‌ సమం
