ప్రముఖ ఫార్మా సంస్థ మ్యాన్కైండ్ ఫార్మా.. ఉదారతను చాటుకుంది. టోక్యో ఒలింపిక్స్లో త్రుటిలో పతకాలు కోల్పోయిన 20 మంది భారత క్రీడాకారులను సన్మానించనుంది. వారి అంకిత భావం, కఠోర శ్రమకు గౌరవం ఇస్తూ.. మరింత ప్రోత్సాహం అందించే విధంగా ఒక్కొక్కరికి రూ. 11 లక్షల చొప్పున నజరానా ఇవ్వనుంది.
అథ్లెట్లు ఎదుర్కొనే, ఎదుర్కొంటున్న కష్టాలను తమ కంపెనీ అర్థం చేసుకుందని, వారిలో మరింత స్ఫూర్తి నింపేందుకు తాము ఈ నిర్ణయం తీసుకున్నట్లు మ్యాన్కైండ్ ఫార్మా ఓ ప్రకటనలో తెలిపింది.
భారత మహిళల హాకీ జట్టులోని మొత్తం 16 మందికి.. రూ. 11 లక్షల చొప్పున అందించనుంది. ఇంకా.. బాక్సర్ సతీశ్ కుమార్, రెజ్లర్ దీపక్ పునియా, షూటర్ సౌరభ్ చౌదరీ, గోల్ఫర్ అదితి అశోక్కూ.. ఈ నగదు బహుమానం అందనుంది.
ఇదీ చూడండి: రెజ్లింగ్ కాంస్య పతక పోరులో దీపక్ పునియా ఓటమి
''దేశానికి ప్రాతినిధ్యం వహించాలంటేనే ఎన్నో ఒడుదొడుకులను ఎదుర్కొని రావాలి. ప్రతి క్రీడలోనూ విజయమే ప్రామాణికం కాదు.''
- రాజీవ్ జునేజా, మ్యాన్కైండ్ ఫార్మా వైస్ ఛైర్మన్, ఎండీ
వీరందరికీ కొద్దిలో పతకం చేజారినా.. ప్రతి ఒక్కరి మనసులు గెలిచారని కొనియాడారు రాజీవ్.
టోక్యో ఒలింపిక్స్లో భారత మహిళల హాకీ జట్టు.. గ్రేట్ బ్రిటన్తో కాంస్య పతక పోరులో పోరాడి ఓడింది. బాక్సర్ సతీశ్ కుమార్ క్వార్టర్ ఫైనల్లో, షూటర్ సౌరభ్ ఫైనల్లో ఓడి పతకానికి కొద్ది దూరంలో నిలిచారు. గోల్ఫర్ అదితి స్ఫూర్తిదాయక ప్రదర్శన చేసినా.. నాలుగో స్థానంతో సరిపెట్టుకుంది.
ఇవీ చూడండి: 13 కుట్లు పడినా.. పోరాడి ఓడిన బాక్సర్ సతీశ్ కుమార్
