టోక్యో ఒలింపిక్స్కు ముందు భారత స్టార్ టెన్నిస్ ప్లేయర్ సానియా మీర్జా పలు టోర్నీల్లో పాల్గొననుంది. కుమారుడితో కలిసి ఈ పర్యటనకు వెళ్లాలనుకున్న సానియాకు కొత్త చిక్కు వచ్చిపడింది. ఆమె కొడుకుతో పాటు కేర్టేకర్కు యూకే వీసా అనుమతి లభించలేదు. ఈ విషయంపై క్రీడా మంత్రిత్వ శాఖను కలిసిందీ టెన్నిస్ స్టార్.
నాటింగ్హామ్ ఓపెన్(జూన్ 6 నుంచి), బర్మింగ్హామ్ ఓపెన్(జూన్ 14 నుంచి), ఈస్ట్బౌర్న్ ఓపెన్(జూన్ 20 నుంచి), వింబుల్డన్(జూన్ 28 నుంచి).. టోక్యో ఒలింపిక్స్కంటే ముందు జరగనున్నాయి. వీటిల్లో పాల్గొనడానికి సానియాకు వీసా మంజూరైంది.
"టార్గెట్ ఒలింపిక్ పోడియం పథకంలో భాగమైన సానియా.. టోక్యో ఒలింపిక్స్కు ముందు ఇంగ్లాండ్లో పలు టోర్నీలు ఆడాల్సి ఉంది. కానీ, తన కుమారుడితో పాటు కేర్టేకర్కి వీసా మంజూరు కాలేదు. కొడుకుని విడిచి నెల రోజుల పాటు ఉండలేనని సానియా.. క్రీడా శాఖకు విజ్ఞప్తి చేసింది. ఈ విషయంపై విదేశీ వ్యవహారాల శాఖకు ఓ లేఖను రాశాం. లండన్లోని భారత రాయబార కార్యలయం ద్వారా యూకే ప్రభుత్వాన్ని వీసా అనుమతికి అంగీకరించాల్సిందిగా విన్నవించాం" అని క్రీడా మంత్రిత్వ శాఖ పేర్కొంది.
ఇదీ చదవండి: 'రౌడీ బేబీ' పాటతో.. వార్నర్ ఈజ్ బ్యాక్
