సెర్బియా స్టార్ టెన్నిస్ ప్లేయర్ నొవాక్ జకోవిచ్.. ఇటాలియన్ ఫైనల్లోకి ప్రవేశించాడు. సెమీఫైనల్లో ఇటలీ ఆటగాడు లోరెంజో సోనెగోపై 6-3, 5-7 (2), 6-2 తేడాతో విజయం సాధించాడు. తొలి సెట్లో ఊపుమీద కనిపించిన లోకల్ హీరో సోనెగో.. తర్వాత జకోవిచ్ ధాటికి నిలువలేకపోయాడు. సొంత గడ్డపై టైటిల్ సాధించాలన్న కల నెరవేరకుండానే టోర్నీ నుంచి నిష్క్రమించాడు సోనెగో.
ఆసక్తికరంగా ఫైనల్..
ఇప్పటికే ఫైనల్ చేరిన రఫెల్ నాదల్తో తుది పోరులో తలపడనున్నాడు జకోవిచ్. 11 సార్లు ఇటాలియన్ ఓపెన్ గెలిచి ఊపుమీదున్న నాదల్ వచ్చే నెల ప్రారంభం కానున్న ఫ్రెంచ్ ఓపెన్కు ముందు ఆత్మవిశ్వాసాన్ని కూడగట్టుకోవాలని భావిస్తున్నాడు. మరోవైపు 5 సార్లు ఇటాలియన్ టైటిల్ను కైవసం చేసుకున్న జకోవిచ్ కూడా ఎర్రమట్టి కోర్టుపై తుది సమరానికి సిద్ధమయ్యాడు.
ఈ ఇద్దరు స్టార్ ఆటగాళ్ల మధ్య ఆదివారం ఫైనల్ మ్యాచ్ జరగనుంది. ఇప్పటివరకు 57 సార్లు వీరిద్దరు ముఖాముఖి పోటీపడ్డారు. ఏదేమైనా ఎర్రమట్టి కోర్టుపై నాదల్దే పైచేయి అనడంలో సందేహమే లేదు!
ఇదీ చదవండి: ఇటాలియన్ ఓపెన్ ఫైనల్లోకి రఫా
