ఏటీపీ ఫైనల్స్ టోర్నీలో స్పెయిన్‌ దిగ్గజం రఫెల్ నాదల్కు చుక్కెదురైంది. గ్రూప్‌ తొలి మ్యాచ్ గెలిచి ఉత్సాహంగా ఉన్న రఫాకు.. రెండో మ్యాచ్లో ఆస్ట్రియా కుర్రాడు డొమినిక్ థీమ్ ఓటమి రుచి చూపించాడు. మంగళవారం జరిగిన పోరులో థీమ్ 7-6 (9/7), 7-6 (7/4)తో నాదల్ను ఓడించాడు. హోరాహోరీ సాగిన ఈ పోరులో రెండు సెట్లను థీమ్ టైబ్రేకర్‌లోనే గెలిచాడు. మరోవైపు రష్యా యువ కెరటం డానియల్ మెద్వెదెవ్ శుభారంభం చేశాడు. అయితే అలెగ్జాండర్‌ జ్వెరెవ్ (జర్మనీ)పై 6-3, 6-4తో గెలిచే క్రమంలో అతను అండర్ ఆర్మ్ సర్వీస్‌తో ప్రత్యర్థినే కాదు అభిమానులనూ ఆశ్చర్యపరిచాడు.
ఈ మ్యాచ్లో ఆరంభంలో దూకుడు ప్రదర్శించిన జ్వెరెవ్ ఆ తర్వాత తడబడ్డాడు. ఆరో గేమ్లో ప్రత్యర్థి సర్వీస్ బ్రేక్ చేసి 4-2తో ఆధిక్యంలోకి వెళ్లిన మెద్వెదెవ్.. అదే జోరులో 6-4తో సెట్ గెలుచుకున్నాడు. అతను ఓ మెరుపు ఏస్తో ఈ సెట్ను కైవసం చేసుకున్నాడు. రెండో సెట్లో 4-3, 30-30తో ఉన్న సమయంలో నెట్ దగ్గర బంతి పడేలా మెద్వెదెవ్ అండర్ ఆర్మ్ సర్వీస్ చేశాడు. అయితే బేస్లైన్ సమీపంలో ఉన్న జ్వెరెవ్ నెట్ దగ్గరకు పరుగెత్తుతూ వచ్చి రిటర్న్ చేసినా.. ఆ తర్వాత మరో రిటర్న్ను అతను సరిగా ఆడలేకపోవడం వల్ల పాయింట్ డానియల్ సొంతమైంది. అక్కడ నుంచి మరింత విజృంభించి ఆడిన ఈ రష్యా కెరటం 6-4తో సెట్తో పాటు మ్యాచ్ను గెలుచుకున్నాడు. ఏటీపీ ఫైనల్స్ టోర్నీలో అతనికిదే తొలి విజయం. గతేడాది టోర్నీలో ఆడిన మూడు మ్యాచ్ల్లోనూ మెద్వెదెవ్ ఓడిపోయాడు.
