ఐదుసార్లు గ్రాండ్స్లామ్ విజేత మరియా షరపోవా.. టెన్నిస్కు రిటైర్మెంట్ ప్రకటించింది. ఈ మేరకు నేడు ప్రకటన చేసింది. "టెన్నిస్ నీకు గుడ్బై చెప్తున్నా" అని భావోద్వేగంతో చెప్పింది. 19 ఏళ్లు ఈ క్రీడలో కొనసాగిన ఈమె.. జీవితంలో మరో మెట్టు ఎక్కేందుకు ప్రయత్నిస్తానంది.
చిన్న వయసులోనే రాకెట్
17 ఏళ్ల వయసులో రాకెట్ పట్టిన షరపోవా... 2004లో తొలి వింబుల్డన్ గెలిచింది. ఆ తర్వాత ఫ్రెంచ్ ఓపెన్, ఆస్ట్రేలియా ఓపెన్, అమెరికా ఓపెన్ టైటిళ్లనూ గెలుచుకుంది. కెరీర్లో ఐదుసార్లు గ్రాండ్స్లామ్తో గెలవడం సహా ప్రపంచ నంబర్వన్ ర్యాంక్లోనూ కొనసాగింది.
డోపింగ్ రాత మార్చేసింది
2016లో డోపింగ్ టెస్టులో విఫలమైన రష్యన్ క్రీడాకారిణి షరపోవా.. దాదాపు 15 నెలలు నిషేధం ఎదుర్కొంది. ఆ ఘటన తన కెరీర్ను మార్చేసింది. దానికి తోడు భుజం గాయంతోనూ చాలా ఇబ్బందులు పడింది.
నిషేధం తర్వాత ఒక్క మ్యాచ్లో మాత్రమే క్వార్టర్స్ వరకు రాగలిగింది. చివరగా ఆస్ట్రేలియా ఓపెన్-2020లో తలపడిన ఈ భామ.. డొన్నా వెకిక్ చేతిలో 6-3, 6-4 తేడాతో ఓడిపోయింది. ప్రపంచ 373వ ర్యాంక్తో కెరీర్ను ముగించింది.
టెన్నిస్లో ఎన్నో విజయాలు అందుకున్న షరపోవా... కెరీర్ చివర్లో దారణమైన ఓటములతో చతికిలపడింది. వరసగా నాలుగు గ్రాండ్స్లామ్ల్లోనూ నిరాశపరిచింది. తనకన్నా తక్కువ ర్యాంకర్ల చేతిలో ఓడి విమర్శలు ఎదుర్కొంది. జీవితంలో ఎన్నో ఎత్తుపల్లాలు చూసిన ఈమె... తాజాగా తన 32వ ఏట ప్రొఫెషనల్ టెన్నిస్కు వీడ్కోలు పలికింది.
