టెన్నిస్‌లో ఈ ఏడాది తొలి గ్రాండ్‌స్లామ్‌ ఆస్ట్రేలియన్ ఓపెన్‌కు రంగం సిద్ధమైంది. అత్యధిక గ్రాండ్‌స్లామ్‌ టైటిళ్ల వీరుడు రోజర్ ఫెదరర్ రికార్డుపై రఫెల్‌ నాదల్‌ కన్నేశాడు. అమ్మగా తొలి టైటిల్ సాధించిన సెరెనా విలియమ్స్.. రికార్డు గ్రాండ్‌స్లామ్‌ టైటిల్‌పై గురి పెట్టింది. మాజీ నం.1 వోజ్నియాకి ఈ టైటిల్ నెగ్గి కెరీర్‌కు ఘనంగా ముగింపు పలకాలని కోరుకుంటోంది. ఎన్నో ఆశలతో బరిలో దిగుతోన్న దిగ్గజాలకు షాకివ్వాలని జూనియర్లు కృతనిశ్చయంతో ఉన్నారు.
ఈ ఏడాది ఆస్ట్రేలియన్ ఓపెన్‌కు ఎన్నో ప్రత్యేకతలు ఉన్నాయి. పురుషుల సింగిల్స్‌లో అత్యధిక గ్రాండ్‌స్లామ్‌లు గెలిచిన ఆటగాడిగా ఫెదరర్ రికార్డు అందుకునేందుకు నాదల్‌ ఒక్క టైటిల్ దూరంలో ఉన్నాడు. ఫెదరర్ ఖాతాలో 20 గ్రాండ్‌స్లామ్‌లు ఉంటే, నాదల్‌ 19 టైటిళ్లు సాధించాడు. ఆస్ట్రేలియన్ ఓపెన్లో విజేతగా నిలిచి ఫెదరర్‌తో పాటు సమానంగా నిలవాలనే పట్టుదలతో నాదల్‌ ఉన్నాడు.
ఇప్పటి వరకూ తన కెరీర్‌లో ఒకేసారి 2009లో ఆస్ట్రేలియన్ ఓపెన్ గెలిచిన నాదల్‌.. ఈ టోర్నీలో మరోసారి సత్తా చాటాలని కోరుకుంటున్నాడు. మరోవైపు ఈ టోర్నీలో విజేతగా నిలవడం ద్వారా తన గ్రాండ్‌స్లామ్‌ టైటిళ్ల సంఖ్యను మరింత పెంచుకోవాలని ఫెదరర్ కోరుకుంటున్నాడు. డిఫెండింగ్ ఛాంపియన్ జకోవిచ్ నుంచి టైటిల్ వేటలో వీళ్లిద్దరికీ గట్టిపోటీ ఎదురుకానుంది.
మహిళల విభాగంలో డెన్మార్క్‌ క్రీడాకారిణి, ప్రపంచ మాజీ నం.1 కరోలిన్‌ వోజ్నియాకి తన కెరీర్‌లో చివరి టోర్నీ ఆడబోతుంది. ఆస్ట్రేలియన్ ఓపెన్ తర్వాత వీడ్కోలు పలుకుతానని ఆమె ఇప్పటికే ప్రకటించింది. 2018లో ఆస్ట్రేలియన్ ఓపెన్ గెలిచిన 29 ఏళ్ల వోజ్నియాకి.. ఫ్రెంచ్‌ ఓపెన్లో రెండు సార్లు రన్నరప్‌గా నిలిచింది.
తల్లయిన తర్వాత గ్రాండ్‌స్లామ్‌ టోర్నీలో పూర్తిస్థాయిలో రాణించలేకపోతున్న మాజీ నంబర్‌వన్‌ సెరెనా విలియమ్స్.. ఆస్ట్రేలియన్ ఓపెన్లో జోరు అందుకోవాలని చూస్తోంది. ఇందులో విజయంతో మార్గరెట్‌ 24 గ్రాండ్‌స్లామ్‌ల ఆల్‌టైమ్‌ రికార్డును అందుకోవాలనే పట్టుదలతో ఉంది. ప్రస్తుతం 23 టైటిళ్లతో రెండో స్థానంలో ఉన్న ఈ అమెరికా తార.. ఆస్ట్రేలియన్ ఓపెన్ టైటిల్‌తో కలను నిజం చేసుకుంటుందో లేదో చూడాలి.
మరోవైపు భారత అగ్రశ్రేణి సింగిల్స్‌ ఆటగాడు ప్రజ్ఞేశ్‌.. ప్రధాన డ్రాకు అర్హత సాధించాడు. క్వాలిఫయర్‌ ఫైనల్‌ రౌండ్లో అతను ఓడినప్పటికీ.. ప్రధాన డ్రా నుంచి ఓ ఆటగాడు తప్పుకోవడం వల్ల ఆ అవకాశం అదృష్టవశాత్తూ ప్రజ్ఞేశ్‌ను వరించింది.
