కరోనా మహమ్మారి కారణంగా చైనా వేదికగా అక్టోబరులో జరగాల్సిన పురుషుల, మహిళల టెన్నిస్ టోర్నీలతో పాటు ఉమెన్స్ టెన్నిస్ అసోసియేషన్ (డబ్ల్యూటీఏ) ఫైనల్స్ను నిర్వాహకులు రద్దు చేశారు. ప్రస్తుత పరిస్థితుల్లో షెడ్యూల్ను వాయిదా వేయడానికి బదులుగా టెన్నిస్ టోర్నీలన్నీ రద్దు చేయాలని చైనా జనరల్ అడ్మినిస్ట్రేషన్ ఆఫ్ స్పోర్ట్స్ ప్రపంచ టెన్నిస్ సమాఖ్యను కోరింది.
"చైనా వేదికగా నిర్వహించాల్సిన ప్రపంచ స్థాయి పోటీలు జరగకపోవటం మాకు చాలా నిరాశను కలిగిస్తోంది. రద్దు చేయాలన్న నిర్ణయాన్ని మేము గౌరవిస్తున్నాం. వచ్చే సీజన్లో వీలైనంత త్వరగా చైనాలో తిరిగి టోర్నీని నిర్వహించడానికి ఆసక్తిగా ఉన్నాం".
- స్టీవ్ సైమన్, డబ్ల్యూటీఏ ఛైర్మన్
ఈ నిర్ణయంతో ఆసియాలో జరిగే ఏటీపీ టోర్నీ మాస్టర్స్ 1000తో పాటు మరో నాలుగు పురుషుల ఈవెంట్లు తుడిచిపెట్టుకుపోయాయి. "కరోనా వ్యాప్తి నియంత్రణలో భాగంగా చైనా ప్రభుత్వం తీసుకున్న నిర్ణయాన్ని మేము గౌరవిస్తాం. ఈ ఏడాది చైనాలో నిర్వహించాల్సిన టోర్నీలు జరగవని ప్రకటించడం చాలా విచారంగా ఉంది" అని ఏటీపీ ఛైర్మన్ ఆండ్రియా గౌడెంజి తెలిపాడు.
కరోనా మహమ్మారి కారణంగా ప్రణాళిక చేసిన టెన్నిస్ టోర్నీలు మార్చి నుంచి నిలిపేశారు. డబ్ల్యూటీఏ, ఏటీపీ పర్యటనలు ఆగస్టులో తిరిగి ప్రారంభించాలని యోచిస్తున్న క్రమంలో పూర్తిగా రద్దు చేస్తున్నట్లు ప్రకటన విడుదలైంది. ప్రస్తుత గ్రాండ్స్లామ్ టోర్నీ యుఎస్ ఓపెన్, ఆగస్టు 31న న్యూయార్క్లో ప్రారంభం కానుంది. వేసవిలో జరగాల్సిన ఫ్రెంచ్ ఓపెన్ మే నుంచి సెప్టెంబరుకు వాయిదా వేశారు.
