T20 World Cup: గత టీ20 వరల్డ్​కప్​ విన్నర్స్ వీళ్లే.. ఈసారి ఎవరో?

క్రికెట్ అభిమానులకు టీ20 ప్రపంచకప్​ పంచే వినోదం మరో స్థాయిలో ఉంటుంది. ధోనీసేన.. తొలి టీ20 ప్రపంచకప్ గెలుపును ఫ్యాన్స్​ ఇప్పటికీ మరచిపోలేరు. ప్రస్తుత ప్రపంచకప్​లో గ్రూప్​ దశలోనే టీమ్​ఇండియా నిష్క్రమించినా.. అద్భుత ఆటతీరుతో ఫైనల్ చేరుకున్నాయి ఆస్ట్రేలియా, న్యూజిలాండ్​ (Australia vs New Zealand). ఆదివారం అమీతుమీకి సిద్ధమయ్యాయి. ఈ నేపథ్యంలో ఇప్పటి వరకు పొట్టి ప్రపంచకప్​ను అందుకున్నది ఎవరెవరో చూసేయండి.

దాదాపు ఐదేళ్ల విరామం తర్వాత జరుగుతున్న (T20 World Cup 2021) టీ20 ప్రపంచకప్ 2021..​ ఆఖరి ఘట్టానికి చేరుకుంది. తొలిసారి పొట్టి ప్రపంచకప్​ను దక్కించుకునేందుకు ఆస్ట్రేలియా, న్యూజిలాండ్​ (Aus vs NZ Final) హోరాహోరీకి సిద్ధమయ్యాయి. ఎవరు గెలిచినా చరిత్రే. అందుకోసం ప్రపంచవ్యాప్తంగా క్రికెట్​ అభిమానులు ఉత్కంఠగా ఎదురుచూస్తున్నారు.

కివీస్, ఆసీస్ ఫైనల్

టోర్నీ ఆరంభమైన 2007లోనే.. తొలి టీ20 ప్రపంచకప్​ను గెలిచి చరిత్ర సృష్టించింది ఎంఎస్ ధోనీ నేతృత్వంలోని నాటి టీమ్​ఇండియా. ఇప్పటివరకు ఆరుసార్లు పొట్టి ప్రపంచకప్​ జరగ్గా.. వెస్టిండీస్​ మాత్రమే రెండుసార్లు టైటిల్​ను కైవసం చేసుకుంది. ఈ నేపథ్యంలో ఏయే జట్టు ఎప్పుడెప్పుడు ఎలా ఈ టీ20 ప్రపంచకప్​ను ముద్దాడిందో తెలుసుకుందాం.

ధోనీ విజయానందం

2007 టీ20 ప్రపంచకప్: ఇండియా-పాకిస్థాన్​

తొలి టీ20 ప్రపంచకప్​ ఛాంపియన్స్​- భారత్

దక్షిణాఫ్రికా వేదికగా తొలి టీ20 ప్రపంచకప్ (Ind vs Pak)​ ఫైనల్లో టీమ్ఇండియా, దాయాదీ పాకిస్థాన్ తలపడ్డాయి. గౌతమ్ గంభీర్ 75 పరుగులు చేయడం వల్ల 157 పరుగుల లక్ష్యాన్ని పాక్​ ముందు నిలిపింది భారత జట్టు. అనంతరం దాయాదీని ఇర్ఫాన్ పఠాన్​ (3/16) కట్టడి చేశాడు. దీంతో 5 పరుగుల తేడాతో గెలిచిన నాటి ధోనీ సేన.. తొలి టీ20 ప్రపంచకప్​ను (T20 World Cup 2007 Winner) ముద్దాడింది.

గెలిచిన ఆనందంలో టీమ్​ఇండియా

2009 టీ20 ప్రపంచకప్: పాకిస్థాన్-శ్రీలంక

ఛాంపియన్స్​గా పాక్

ఇంగ్లాండ్​ వేదికగా జరిగిన రెండో టీ20 ప్రపంచకప్​​ (T20 World Cup 2009) తుది పోరులో శ్రీలంకపై 8 వికెట్ల తేడాతో ఘనవిజయం సాధించింది పాక్. తొలి పొట్టి వరల్డ్​కప్​లో రన్నరప్​గా నిలిచిన ఆ జట్టు.. ఈ టోర్నీలో కసితీరా ఆడి టైటిల్​ను (T20 World Cup 2009 Winner) కైవసం చేసుకుంది.

2010 టీ20 ప్రపంచకప్​: ఇంగ్లాండ్-ఆస్ట్రేలియా

ఛాంపియన్స్​ ఇంగ్లాండ్

వెస్టిండీస్​ వేదికగా 2010 టీ20 ప్రపంచకప్​ (T20 World Cup 2010) ఫైనల్లో ఆస్ట్రేలియాపై 7 వికెట్ల తేడాతో గెలిచి టైటిల్​ను ఎగరేసుకుపోయింది ఇంగ్లాండ్ (T20 World Cup 2010 Winner). కెవిన్ పీటర్సన్​.. ప్లేయర్​ ఆఫ్​ ది సిరీస్​గా నిలిచాడు.

2012 టీ20 ప్రపంచకప్​: వెస్టిండీస్​-శ్రీలంక

టైటిల్​ గెలిచిన విండీస్

శ్రీలంక వేదికగా జరిగిన ఈ టోర్నీలో (2012 ICC World Twenty20) వెస్టిండీస్​ తొలిసారి ఫైనల్ చేరి కప్పు గెలిచింది (2012 ICC World Twenty20 Winner). 138 పరుగుల లక్ష్యాన్ని ఛేదించడంలో లంక బ్యాటర్లు చేతులెత్తేశారు. దీంతో 2009 టీ20 ప్రపంచకప్​ ఓడిన ఆ జట్టుకు మరోసారి నిరాశ తప్పలేదు. అజంతా మెండిస్​ (15 వికెట్లు) టోర్నీలోనే అత్యధిక వికెట్లు తీశాడు.

2014 టీ20 ప్రపంచకప్​: భారత్-శ్రీలంక

జగజ్జేతగా లంక

రెండుసార్లు ఫైనల్​ చేరినా కప్పును ముద్దాడలేకపోయిన శ్రీలంక.. బంగ్లాదేశ్​ వేదికగా జరిగిన ఐదో టీ20 ప్రపంచకప్​తో (2014 ICC World Twenty20) ఆ కలను నెరవేర్చుకుంది. ఫైనల్లో టీమ్​ఇండియాపై 6 వికెట్ల తేడాతో విజయం సాధించింది. దీంతో రెండోసారి పొట్టి వరల్డ్​కప్​ను ఖాతాలో వేసుకోవాలనుకున్న భారత్​కు నిరాశే మిగిలింది.

కోహ్లీ రాణించినా..

దంచికొట్టిన విరాట్

ఫైనల్ మ్యాచ్​లో విరాట్​ కోహ్లీ (Virat Kohli News) ఆదుకోవడం వల్ల టీమ్​ఇండియా 130 పరుగులు చేయగలిగింది. అనంతరం 17.5 ఓవర్లలోనే ఆ లక్ష్యాన్ని ఛేదించింది లంక. టోర్నీ సాంతం అద్భుతంగా రాణించిన కోహ్లీ (Virat Kohli Records).. ప్లేయర్​ ఆఫ్​ ది సిరీస్​గా,​ అత్యధిక పరుగుల (319) వీరుడిగా నిలిచాడు.

2016 టీ20 ప్రపంచకప్​: వెస్టిండీస్-ఇంగ్లాండ్

రెండోసారి గెలిచిన ఆనందంలో కరీబియన్లు

భారత్​ వేదికగా జరిగిన ఈ టోర్నీలో (2016 ICC World Twenty20) ఇంగ్లాండ్​పై 4 వికెట్ల తేడాతో గెలిచి రెండోసారి పొట్టి ప్రపంచకప్​ను కైవసం చేసుకుంది వెస్టిండీస్. ఇప్పటివరకు రెండు టీ20 వరల్డ్​కప్​ టైటిళ్లను గెలిచింది కరీబియన్ జట్టు మాత్రమే. ఈ సీజన్​లోనూ అద్భుత ప్రదర్శనతో ప్లేయర్​ ఆఫ్​ ది సిరీస్​గా నిలిచాడు కోహ్లీ.

ధోనీ, విరాట్ కోహ్లీ

ఇవీ చూడండి: