టీ20 ప్రపంచకప్(T20 World Cup 2021) ప్రారంభానికి ముందువరకు అందరి ఫేవరెట్ జట్టు టీమ్ఇండియానే. టైటిల్ గెలిచే సామర్థ్యం ఉన్న జట్టు అంటే.. అందరూ చెప్పిన మాట టీమ్ఇండియా. కానీ, ఒక్కసారిగా ఈ ఊహాగానాలకు చెక్ పెట్టింది పాకిస్థాన్(IND vs PAK T20 clash). తొలి మ్యాచ్లోనే భారత్ను చిత్తుగా ఓడించింది. టీ20 వరల్డ్కప్ చరిత్రలో భారత్పై తొలి విజయం నమోదు చేసింది. టీ20 టోర్నీల్లో ఎప్పుడెలా జరుగుతుందో ఎవరూ ఊహించలేరు అనే మాటను నిజం చేసి చూపించింది.
ఈ టోర్నీలోని తమ రెండో మ్యాచ్లో టీమ్ఇండియాపై ఘన విజయం సాధించింది న్యూజిలాండ్(IND vs NZ T20 clash). అంతే.. టీ20 వరల్డ్ కప్ సెమీస్ చేరుకునే అవకాశాలను కూడా దాదాపుగా కోల్పోయింది ఇండియా. దీంతో కోహ్లీసేనపై తీవ్ర విమర్శల పరంపర కొనసాగుతోంది. ఈ నేపథ్యంలో.. గత కొన్నేళ్లుగా టీ20 ప్రపంచకప్లో భారత జట్టు చేస్తున్న పొరపాట్లు ఏంటి?
2021 టీ20 ప్రపంచకప్:
టీమ్ఇండియా తన చిరకాల ప్రత్యర్థి పాకిస్థాన్తో తొలి మ్యాచ్ ఆడింది. ఈ మ్యాచ్లో పాక్ బౌలర్ షహీన్ షా అఫ్రిది(Shaheen Afridi vs India).. టీమ్ఇండియా టాప్ ఆర్డర్పై పూర్తి ఆధిపత్యం చెలాయించాడు. మ్యాచ్ ప్రారంభమైన కొద్ది సేపటికే ఇద్దరు ఓపెనర్లను పెవిలియన్కు పంపాడు. అయితే.. సారథి కోహ్లీ, పంత్ నిలకడగా రాణించడం వల్ల టీమ్ఇండియాకు 151 పరుగుల గౌరవప్రదమైన స్కోరు లభించింది.
అనంతరం ఛేదనలో ఒక్క వికెట్ కోల్పోకుండా భారత్పై గెలిచింది పాక్. అయితే.. ఆరంభంలో భువనేశ్వర్ కుమార్, షమిలకు బౌలింగ్ చేసే అవకాశం ఎక్కువగా ఇచ్చాడు విరాట్. దీంతో పాక్ బ్యాటర్లు మరింత రెచ్చిపోయారు. కోహ్లీ.. జస్ప్రీత్ బుమ్రాను ముందే బరిలోకి దింపి ఉంటే పరిస్థితి వేరేలా ఉండేదని కొందరు నిపుణులు అభిప్రాయపడ్డారు.
ఓపెనర్గా ఇషాన్..
న్యూజిలాండ్తో మ్యాచ్లో సూర్యకుమార్ యాదవ్కు బదులుగా ఇషాన్ కిషన్ను జట్టులోకి తీసుకుంది టీమ్ఇండియా మేనేజ్మెంట్. అయితే.. అతడిని కేఎల్ రాహుల్తో ఓపెనర్గా(Ishan Kishan Opener) బరిలోకి దింపింది. ఈ నిర్ణయం టీమ్ఇండియా కొంపముంచింది. ఓపెనర్లు సహా.. తర్వాత బ్యాటింగ్ బరిలోకి దిగిన రోహిత్ శర్మ కూడా విఫలమయ్యాడు. దీంతో మిడిలార్డర్పైనా ఒత్తిడి పెరిగింది.
ఈ నిర్ణయం భారత జట్టు చేసిన పెద్ద పొరపాటు అని రోహిత్- రాహుల్నే ఓపెనర్లుగా పంపించి ఉంటే బాగుండేదని ముంబయి ఇండియన్స్ జట్టు హెడ్ కోచ్ జయవర్ధనే అభిప్రాయపడ్డాడు.
మేటి జట్టుతో పోరుకు సిద్ధమైనా.. టీమ్ఇండియా ఈ టోర్నీలో ఘోరంగా విఫలమైంది. అయితే.. వరుసగా బయోబబుల్లో ఉండటం వల్ల కూడా ఆటగాళ్లపై ఒత్తిడి పెరిగిందని కొందరు సీనియర్ క్రికెటర్లు చెబుతున్నారు.
2009 టీ20 ప్రపంచకప్:
2007లో మహేంద్ర సింగ్ ధోనీ సారథ్యంలో టీమ్ఇండియా టీ20 ప్రపంచకప్(Dhoni in t20 world cup 2007) గెలిచింది. ఈ నేపథ్యంలోనే ఐపీఎల్ కూడా ప్రారంభమైంది. ఈ ఐపీఎల్లో భాగంగా యువ ఆటగాళ్లు తమ ప్రతిభను చాటారు.
అనంతరం 2009లో కూడా టీమ్ఇండియా కప్ గెలుస్తుందని అందరూ భావించారు. ఆల్రౌండర్ యువరాజ్ సింగ్ స్థానాన్ని భర్తీ చేయగల సామర్థ్యం రవీంద్ర జడేజాకు ఉందని ధోనీ కూడా భావించాడు. అండర్ 19 వరల్డ్ కప్, ఐపీఎల్లో జడేజా ఆటతీరును చూసి ధోనీ ఈ నిర్ణయానికి వచ్చాడు.
ఈ నేపథ్యంలో ఇంగ్లాండ్తో జరిగిన మ్యాచ్లో జడేజాకు అవకాశం ఇచ్చాడు ధోనీ. కానీ, 35 బంతుల్లో 25 పరుగులు చేసి జడేజా నిరాశపరిచాడు. 3 పరుగుల తేడాతో టీమ్ఇండియా ఓటమిపాలై టోర్నీ నుంచి నిష్క్రమించింది.
2016 టీ20 ప్రపంచకప్:
ఈ టోర్నీ ఆరంభంలో న్యూజిలాండ్తో ఓటమి అనంతరం టీమ్ఇండియా నిలకడగా రాణించి వరుస విజయాలతో దూసుకెళ్లింది. అయితే.. వెస్టిండీస్తో(IND vs WI t20) జరిగిన సెమీస్ మ్యాచ్లో విరాట్ కోహ్లీ సూపర్ ఇన్నింగ్స్తో రాణించాడు. భారత జట్టు 192 పరుగుల భారీ లక్ష్యాన్ని విండీస్ ముందుంచుంది. కానీ, నో బాల్స్ కారణంగా టీమ్ఇండియా ఓటమిపాలైంది.
విధ్వంసకర బ్యాట్స్మన్ క్రిస్ గేల్ను మొదటి ఓవర్లోనే పెవిలియన్ పంపాడు బుమ్రా. తర్వాత రవిచంద్రన్ అశ్విన్ 18 పరుగుల వద్ద సిమన్స్ ఔట్ చేశాడు. కానీ, అతడు నో బాల్ వేసినట్లు రిప్లేలో స్పష్టమైంది. అనంతరం హార్దిక్ పాండ్య కూడా నో బాల్ వేసి సిమన్స్కు మరో లైఫ్ ఇచ్చాడు. దీంతో సిమన్స్ కీలక ఇన్నింగ్స్ ఆడి విండీస్ను గెలిపించాడు.
రహానే ఎంపిక కూడా పొరపాటే!
విండీస్తో సెమీస్ మ్యాచ్లో భారత్ అజింక్య రహానేను ఎంపిక చేసింది. ఆల్రౌండర్ యువరాజ్ సింగ్ గాయం వల్ల టోర్నీ మధ్యలోనే వైదొలిగిన కారణంగా రహానేకు అవకాశం లభించింది. ఈ మ్యాచ్లో రహానే 35 బంతుల్లో 40 పరుగులే చేశాడు.
రహానే మరిన్ని పరుగులు చేసినా.. భారత జట్టు రహానేకు బదులుగా మరో మేటి బౌలర్తో బరిలోకి దిగి ఉన్నా ఫలితం మరోలా ఉండేది.
ఇదీ చదవండి:
