Asian Wrestling Championship 2023 : ఆసియా క్రీడలు, ప్రపంచ ఛాంపియన్‌షిప్‌ సెలెక్షన్‌ ట్రయల్స్‌లో భాగంగా ఆరుగురు రెజ్లర్లకు మినహాయింపు ఇవ్వడాన్ని తప్పుబట్టిన ప్రముఖ రెజ్లర్ యోగేశ్వర్ దత్ వ్యాఖ్యలపై స్పందించారు భారత స్టార్ రెజ్లర్లు. తమకు మినహాయింపు కల్పించమని తాము ఇండియన్ ఒలంపిక్ అసోసియేషన్ (ఐఓఏ)ను కోరలేదని.. అలా మేము చేసినట్లు నిరూపిస్తే రెజ్లింగ్ ఆట నుంచి పూర్తిగా తప్పుకుంటామని స్పష్టం చేశారు.
'మీ గళం విప్పండి..' : యోగేశ్వర్ దత్
సెలెక్షన్‌ ట్రయల్స్ నుంచి కొందరు స్టార్ రెజ్లర్లు బజ్రంగ్ పునియా, వినేశ్ ఫోగాట్, సాక్షి మాలిక్, సంగీత్ ఫొగాట్, సత్యవర్త్ కడియన్, జితేందర్ కిన్హాలు సెలక్షన్స్ విజేతలతో పోటీపడి గెలిస్తే ఇక అలానే జట్టులో చోటు సంపాదించుకోవచ్చు అనే ఐఓఏ ఇటీవలే ప్రకటించింది. అయితే రెజ్లర్లు ఆందోళన తెలుపుతున్నది ఇందుకోసమేనా అంటూ ఐఓఏ అడ్‌హక్‌ కమిటీ ప్యానెల్ సభ్యులను యోగేశ్వర్ దత్ ప్రశ్నిస్తూ ఘాటైన వ్యాఖ్యాలు చేశాడు. ఈ నేపథ్యంలో ప్రస్తుతం జరుగుతున్న వివక్షకు వ్యతిరేకంగా తమ గళం విప్పాలని కోచ్లు, తోటి జూనియర్ రెజ్లర్లతో పాటు వారి తల్లిదండ్రులనూ కోరాడు దత్.
'కాస్త గడువు కోరాం'..
మరోవైపు ఆసియా క్రీడల నుంచి మినహాయింపు పొందిన రెజ్లర్ సాక్షి మాలిక్ 'తాము సెలక్షన్స్ ట్రయల్స్ నుంచి మినహాయింపును కోరలేదని.. కేవలం ఆటకు సన్నద్ధం కావడానికి మాత్రమే సమయం అడిగినట్లుగా' వివరించారు. మేము ఎవరి హక్కులకు భంగం కలిగించలేదు. ఆరు నెలలుగా ఆటకు దూరంగా ఉన్నందునే ప్రాక్టీస్ కోసం కాస్త గడువు కావాలని సమాఖ్య పెద్దలను అడిగినట్లుగా సాక్షి తెలిపారు. దయచేసి దీనిని తప్పుగా ప్రచారం చేయవద్దని ఆమే కోరారు.
మాపై విషం చిమ్మొద్దు..
Bajrang Punia Wrestler Protest : " ఈ సెలక్షన్స్ ట్రయల్స్కు సంబంధించి మీకు ఏమైనా అనుమానాలు ఉంటే మీరు నేరుగా క్రీడల శాఖ మంత్రిని కలిసి మాట్లాడండి. వారు ఏ ప్రాతిపదికన ఈ నిర్ణయం తీసుకున్నారనేది మీకే వివరంగా తెలుస్తుంది. కానీ, ఇలా సోషల్ మీడియా ద్వారా తప్పుడు ప్రచారం చేస్తూ దయచేసి మాపై విషం చిమ్మొద్దు" అంటూ బజ్రంగ్ పునియా అన్నాడు. తాము మినహాయింపు కోరినట్లు నిరూపిస్తే పూర్తిగా కుస్తీ ఆట నుంచే తప్పుకుంటామని బజ్రంగ్ స్పష్టం చేశాడు.
