ముంబయి వేదికగా జరిగిన ప్రపంచ యూత్ చెస్లో భారత యువక్రీడాకారులు సత్తా చాటారు. శనివారం ముగిసిన ఈ ఛాంపియన్‌షిప్‌లో భారత్ ఓ స్వర్ణం, మూడు రజతాలు, మూడు కాంస్యాలు గెలిచింది.
ప్రజ్ఞానందకు స్వర్ణం...
ప్రపంచ యూత్ చెస్ ఛాంపియన్‌షిప్‌లో భారత్ 14 ఏళ్ల గ్రాండ్‌మాస్టర్‌ ప్రజ్ఞానంద్ టైటిల్ గెలిచి ఔరా అనిపించాడు. తమిళనాడుకు చెందిన ఈ క్రీడాకారుడు అండర్‌-18 ఓపెన్‌ విభాగంలో... స్వర్ణాన్ని కైవసం చేసుకొని ప్రపంచ ఛాంపియన్‌గా నిలిచాడు. శనివారం చివరిదైన 11వ రౌండ్లో వాలెంటిన్‌ బకెల్స్‌ (జర్మనీ)తో గేమ్‌ను డ్రా చేసుకున్న అతను 9 పాయింట్లతో అగ్రస్థానాన్ని దక్కించుకున్నాడు.
మురిపించిన తెలుగుతేజం...
యూత్ చెస్లో కాంస్య పతకంతో రాణించాడు తెలంగాణ కుర్రాడు శ్రీశ్వాన్. శనివారం జిరిగిన టోర్నీలో అండర్‌-14 ఓపెన్‌ విభాగంలో పాల్గొన్న ఈ యువతేజం...ప్రత్యర్థి అభినందన్‌పై గెలిచి మూడో స్థానంలో నిలిచాడు. మొత్తం 11 రౌండ్ల నుంచి ఎనిమిది పాయింట్లు సాధించాడు.
- 13 ఏళ్లకే ఇంటర్నేషనల్‌ మాస్టర్‌గా నిలిచి తెలంగాణ నుంచి అతి పిన్న వయసులో ఆ ఘనత సాధించిన క్రీడాకారుడిగా ఇదివరకే శ్రీశ్వాన్ రికార్డు నమోదు చేశాడు.
- గత డిసెంబర్‌లో స్పెయిన్‌లో జరిగిన సన్‌వే సిట్జెస్‌ అంతర్జాతీయ చెస్ టోర్నీలో మాజీ ప్రపంచ ర్యాపిడ్‌ చెస్ ఛాంపియన్‌, ఉక్రెయిన్‌ గ్రాండ్‌మాస్టర్‌ ఇవాంచుక్‌పై విజయం సాధించి శ్రీశ్వాన్ వెలుగులోకి వచ్చాడు. ఆ గేమ్‌లో 26 ఎత్తుల్లోనే విజయం సాధించి అందరినీ ఆశ్చర్యపరిచాడు.
ఆసియా యూత్ చెస్ ఛాంపియన్‌షిప్‌ అండర్‌-14 వ్యక్తిగత విభాగంలో స్వర్ణంతో సత్తాచాటాడు. బాచుపల్లిలోని కెన్నడీ పాఠశాలలో ఎనిమిదో తరగతి చదువుతున్న శ్రీశ్వాన్ ప్రపంచ ఛాంపియన్‌ కావడమే తన లక్ష్యమని చెప్పాడు.
అండర్‌-14 ఓపెన్‌ విభాగంలో శ్రీహరి రజతం నెగ్గాడు. అండర్‌-14 బాలికల విభాగంలో దివ్య దేశ్‌ముఖ్‌, రక్షిత రవి వరుసగా రెండు, మూడు స్థానాల్లో నిలిచారు. అండర్‌-16 ఓపెన్‌లో అరోన్యాక్‌ ఘోష్‌ కాంస్యం సొంతం చేసుకున్నాడు. అండర్‌-18 బాలికల విభాగంలో వంతిక అగర్వాల్‌ వెండి పతకం గెలుచుకుంది. ఈ ఛాంపియన్‌షిప్‌లో భారత్ ఓ స్వర్ణం, మూడు రజతాలు, మూడు కాంస్యాలు ఖాతాలో వేసుకుంది.
ఇదీ చదవండి...
