ప్రపంచ ఛాంపియన్షిప్లకు రెజ్లింగ్ జట్లను ఎంపిక చేసేందుకు సిద్ధమైంది భారత రెజ్లింగ్ సమాఖ్య(డబ్ల్యూఎఫ్ఐ). జులై 26 నుంచి 28 వరకు సోనిపట్, లఖ్నవూ వేదికగా ట్రయల్స్ నిర్వహించనుంది. కజకిస్థాన్ వేదికగా జరగనున్న ప్రపంచ ఛాంపియన్షిప్నకు ఇప్పటికే బృందాన్ని ఎంపిక చేసినట్లు ప్రకటించింది. సెప్టెంబర్లో ప్రారంభం కానున్న ఈ టోర్నీలో సత్తా చాటిన వారికి టోక్యో ఒలింపిక్స్కు అర్హత లభిస్తుంది.
ఆరు కేటగిరీలకు మాత్రమే...
ఫురుషుల ఫ్రీ స్టయిల్ జట్టు ఎంపిక బాల్ఘర్లోని శాయ్(భారత క్రీడల ప్రాధికార సంస్థ) కేంద్రం వద్ద శుక్రవారం జరగనుంది. ఆరు రకాల విభాగాల్లో (57, 64, 74, 86, 97, 125 కేజీలు) క్రీడాకారులకు ఎంపిక ప్రక్రియ చేపట్టనున్నారు. లఖ్నవూలోని శాయ్ సెంటర్లో ఆరు రకాల విభాగాల్లో (50, 53, 57, 62, 68, 76 కేజీలు) మహిళా క్రీడాకారిణులను ఎంపిక చేయనున్నారు. ఈ నెలలో చేపట్టనున్న ట్రయిల్స్ ఆరు విభాగాల రెజ్లర్లకు మాత్రమేనని... మిగిలిన నాలుగు విభాగాల క్రీడాకారులకు ఆగస్ట్లో పరీక్షలు నిర్వహిస్తామని డబ్ల్యూఎఫ్ఐ అధికారులు వెల్లడించారు.
జాతీయ క్యాంప్లో చోటు దక్కించుకొని హాజరుకాలేని క్రీడాకారులపై చర్యలు చేపడతామని ఫెడరేషన్ ఆదేశించింది. ఎవరైనా శిక్షణ తరగతులకు డుమ్మా కొడితే వారిని సెలక్షన్లో పాల్గొనేందుకు అనుమతించబోమని హెచ్చరించింది. ఒలింపిక్ పతక విజేత సుశీల్ కుమార్కు మాత్రమే దీని నుంచి మినహాయింపు ఇచ్చింది. రష్యాలో శిక్షణ కారణంగా ఏడాది పాటు జాతీయ క్యాంప్కు హాజరుకాలేదీ స్టార్ రెజ్లర్. ప్రస్తుతం జరగనున్న ట్రయిల్స్లో మాత్రం భాగం కానున్నాడు.
ఒలింపిక్స్లో భారత జోష్ పెరగాలి...
భారత్ సాధించే పతకాల సంఖ్య రెట్టింపు అయినప్పుడే ఒలింపిక్స్కు ఆతిథ్యం ఇవ్వాలన్న దేశ కలలు సాకారమవుతాయని భారత ఒలింపిక్ అసోసియేషన్‌ అధ్యక్షుడు నరేందర్‌ బత్రా అన్నారు. 2032 ఒలింపిక్స్, 2030 ఆసియన్‌ గేమ్స్‌, 2026 యూత్‌ ఒలింపిక్స్ నిర్వహణకు బిడ్డింగ్‌ వేయాలనుకుంటున్నట్లు చెప్పుకొచ్చారు. టోక్యో క్రీడల్లో పతకాలను 10 నుంచి 12కి పెంచుకోవాలి. 2024 నాటికి 25, 2028 నాటికి 40 మెడల్స్ సాధించే విధంగా లక్ష్యాలు నిర్దేశించుకొని శ్రమించాలని క్రీడాకారులకు సూచించారు.
