భారత తరఫున మరో ముగ్గురు అథ్లెట్లు టోక్యో ఒలింపిక్స్ 2020కు అర్హత సాధించారు. నేషనల్ ఓపెన్ రేస్ వాకింగ్ ఛాంపియన్ షిప్లో భాగంగా నిర్వహించిన పోటీల్లో సందీప్ కుమార్, ప్రియాంక గోస్వామిలు పురుషుల, మహిళల 20 కి.మీ.ల విభాగంలో జాతీయ రికార్డులు నెలకొల్పారు.
కొవిడ్ తర్వాత దేశవాళీలో జరుగుతున్న అతి పెద్ద పోటీలు ఇవే కావడం గమనార్హం. తాజా ముగ్గురితో కలిపి టోక్యో గేమ్స్కు అర్హత పొందిన వారి సంఖ్య ఐదుకు చేరింది. 20 కి.మీ.ల విభాగంలో కేటీ ఇర్ఫాన్, భావన జాట్లు ఇది వరకే అర్హత సాధించారు.
తాజా పోటీల్లో సందీప్.. గంటా 20 నిమిషాల 16 సెకన్లలో 20 కి.మీ.లు వాకింగ్ చేయగా.. గోస్వామి గంటా 28 నిమిషాల 45 సెకన్లలో టాస్క్ పూర్తి చేసింది. మరో అథ్లెట్ రాహుల్ కూడా గంటా 20 నిమిషాల 21 సెకన్లలో వాక్ చేశాడు.
కాగా, ఒలింపిక్స్లో అర్హత పొందాలంటే మహిళ అథ్లెట్లకు గంటా ముప్పై ఒకటి నిమిషాల్లో, పురుషులు అయితే గంటా ఇరవై ఒకటి నిమిషాల్లో 20 కి.మీ.ల నడకను పూర్తి చేయాలి.
ఒలింపిక్స్ను టోక్యో వేదికగా ఈ ఏడాది జులై-ఆగస్టు మధ్య నిర్వహించనున్నారు.
ఇదీ చదవండి: చెన్నై టెస్టు: రోహిత్ శతకం- అరుదైన రికార్డు
