టోక్యో ఒలింపిక్స్కు అర్హత సాధించే అథ్లెట్లకు మార్చి నెలఖారు నుంచి కొవిడ్ టీకా అందే అవకాశముంది. ఈ మేరకు క్రీడా మంత్రిత్వ శాఖ కృషి చేస్తోంది. వ్యాక్సినేషన్ ప్రక్రియలో ఒలింపిక్స్ అథ్లెట్లకు ప్రాధాన్యత ఇవ్వాలని ఇప్పటికే ఆ శాఖ.. ఆరోగ్య శాఖను అభ్యర్థించింది.
"ఒలింపిక్స్కు అర్హత సాధించిన అథ్లెట్లు, కోచ్లు, సిబ్బందికి టీకా పంపిణీలో ప్రాధాన్యత ఇవ్వాలని ఆరోగ్య శాఖను కోరాం. రెండు దశల్లో ఆ ప్రక్రియ నిర్వహించేందుకు ఇప్పటికే ప్రణాళిక సిద్ధం చేశాం. ఆరోగ్య శాఖ అనుమతివ్వగానే అమలు చేస్తాం. మార్చి చివరి కల్లా వ్యాక్సినేషన్ ప్రక్రియ ప్రారంభించాలని అనుకుంటున్నాం." అని క్రీడా మంత్రిత్వ శాఖ అధికారి తెలిపారు.
జులై 23 నుంచి ఆగస్టు 8 వరకు టోక్యోలో ఒలింపిక్స్ జరగనున్నాయి. అందుకు 5 నెలల సమయం కూడా లేనందున టీకా పంపిణీలో ఒలింపిక్స్కు వెళ్లే అథ్లెట్లకు తొలి ప్రాధాన్యత ఇవ్వాలని కోరుతూ ఇటీవల ఆరోగ్య శాఖకు భారత ఒలింపిక్ సంఘం లేఖ రాసింది.
ఇప్పటివరకు 74 మంది భారత అథ్లెట్లు ఒలింపిక్స్కు అర్హత సాధించారు. 150 మంది వరకు అర్హత సాధించే అవకాశముందని తెలుస్తోంది. "టీకా పంపిణీపై ప్రభుత్వ విధానం స్పష్టంగా ఉంది, ఒలింపిక్స్ అథ్లెట్లకు మొదటగా టీకా ఇవ్వడమే మా ప్రాధాన్యం అయినా.. తుది నిర్ణయం ఆరోగ్య శాఖ చేతుల్లోనే ఉంది" అని క్రీడా మంత్రి కిరణ్ రిజుజు గతంలో చెప్పారు.
ఇదీ చూడండి: 'అతను ఇంకా ఆడుతుంటే.. నేను సోఫాలోనే ఉన్నా'
