"ప్రపంచాన్ని మార్చే సామర్థ్యం క్రీడలకు ఉంది. స్ఫూర్తినిచ్చే శక్తి క్రీడలకు ఉంది. ప్రజలను ఒక్కటి చేసే సత్తా క్రీడలకు ఉంది. ఒక్కమాటలో చెప్పాలంటే పేదరికాన్ని జయించేందుకు, అభివృద్ధి సాధించేందుకు క్రీడలు ఓ ఆయుధంగా పనికొస్తాయి" దక్షిణాఫ్రికా మాజీ అధ్యక్షుడు, దాతృత్వవేత్త నెల్సన్ మండేలా గతంలో చేసిన వ్యాఖ్యలు ఇవి. ఈ మాటలను నిజం చేస్తూ పేదరికాన్ని జయించి ఉన్నత శిఖరాలకు ఎగిసిన అథ్లెట్లు ఎందరో ఉన్నారు. వారిలో భారత బాక్సర్ విజేందర్ సింగ్ ముందువరుసలో ఉంటాడు. పేదరికంలో పుట్టిపెరిగినా, అతడి సంకల్పం, ఆత్మవిశ్వాసం ముందు ఏదీ నిలబడలేదు. తనని తాను నమ్ముకుని ఎన్ని కష్టాలొచ్చినా ముందుకు సాగాడు.
డ్రైవర్ గారి అబ్బాయి..
హరియాణాలో కలువాస్ గ్రామంలో 1985 అక్టోబర్29న జన్మించాడు విజేందర్. అతడి బాల్యం మొత్తం కటిక పేదరికంలోనే సాగింది. విజేందర్ తండ్రి మహిపాల్ సింగ్ ఓ బస్సు డ్రైవర్. విజేందర్, అతని సోదరుడు మనోజ్ చదువులకు డబ్బుల ఆయన బస్సు డ్రైవర్గా ఎక్కువ సమయం పనిచేసేవారు. తండ్రి కష్టాన్ని చిన్నతనంలోనే అర్థం చేసుకున్న విజేందర్.. పేదరికం నుంచి కుటుంబాన్ని గట్టెక్కించాలని నిర్ణయించుకున్నాడు. అందుకు అతడు ఎంచుకున్న మార్గం 'బాక్సింగ్'
వాస్తవానికి బాక్సింగ్లో విజేందర్కు స్ఫూర్తి అతడి అన్న మనోజ్. మనోజ్ బాక్సింగ్లో దిట్ట. 1998లో క్రీడా కోటాలో ఆర్మీలో చేరాడు మనోజ్. ఆ తర్వాత విజేందర్కు ఆర్థికంగా సాయం చేసి అత్యుత్తమ బాక్సర్గా తీర్చిదిద్దాడు. ఆటపై విజేందర్కు ఉన్న ప్రేమ, ఆటలో అతడి ప్రతిభను గుర్తించిన తల్లిదండ్రులు కూడా చదువుకోమని ఒత్తిడి చేయకుండా.. ఆటవైపే వెళ్లేందుకు పూర్తి స్వేచ్ఛనిచ్చారు. పేదరికంతో కొట్టుమిట్టాడుతున్న ఓ కుటుంబం.. చదువుకుంటే మంచి జీతం వచ్చే ఉద్యోగం వస్తుందని ఆశించకుండా.. కొడుకు ప్రతిభను గుర్తించి ప్రోత్సహించడం అత్యంత గొప్ప విషయం.
తల్లిదండ్రులు, అన్న మనోజ్ తన మీద పెట్టుకున్న నమ్మకాన్ని వమ్ము చేయలేదు విజేందర్. అతి కొద్ది కాలంలోనే రాష్ట్రస్థాయి పోటీల్లో గెలుపొంది సీనియర్ల దృష్టిలో పడ్డాడు. 1997లో సబ్-జూనియర్ స్థాయిలో రజతం, 2000లో జాతీయస్థాయిలో స్వర్ణం సాధించాడు. 2003లో ఆల్-ఇండియా యూత్ బాక్సింగ్ ఛాంపియన్గా అవతరించాడు. కానీ విజేందర్ జీవితం మలుపు తిరిగింది మాత్రం 2003 ఆఫ్రో-ఆసియాన్ గేమ్స్తోనే! జూనియర్ బాక్సరే అయినప్పటికీ, ట్రయల్స్లో పోటీ చేసి ఆఫ్రో-ఆసియాన్ గేమ్స్లో చోటు దక్కించుకున్న ఈ డాషింగ్ బాక్సర్.. ఆ పోటీల్లో ఏకంగా రజతం గెలిచి అందరి ప్రశంసలు పొందాడు.
2008 బీజింగ్ ఒలింపిక్స్లో కాంస్యం సాధించిన విజేందర్ పేరు దేశవ్యాప్తంగా మారుమోగిపోయింది. ఒలింపిక్స్ బాక్సింగ్ విభాగంలో దేశానికి పతం సాధించిన తొలి అథ్లెట్గా చరిత్ర సృష్టించాడు విజేందర్.
ఆ తర్వాత ప్రొఫెషనల్ బాక్సింగ్వైపు అడుగులు వేసి అక్కడా దుమ్మురేపాడు విజేందర్. దీంతో అతడి క్రేజ్ అమాంతం పెరిగిపోయింది.
బాలీవుడ్లోనూ..
బాక్సింగ్ తొలినాళ్లల్లో.. మోడలింగ్ కూడా చేశాడు విజేందర్. అలా ఖర్చుల కోసం ఇంట్లో అడగకుండా తనకు తానే సంపాదించుకున్నాడు. కొన్నేళ్ల తర్వాత బాలీవుడ్లోనూ దర్శనమిచ్చాడు. 2014లో ఫగ్లీ సినిమాలో నటించాడు.
2011లో సాఫ్ట్వేర్ ఇంజినీర్ అర్చన సింగ్ను పెళ్లి చేసుకున్నాడు విజేందర్. వారికి ఇద్దరు కుమారులు.
అవార్డులు...
దేశంలో బాక్సింగ్కు ఆదరణ లభించేందుకు తనవంతు పాత్ర పోషించిన విజేందర్కు 2006లో అర్జున అవార్డుతో సత్కరించింది భారత ప్రభుత్వం. 2010లో పద్మశ్రీ అవార్డు విజేందర్ను వరించింది.
ఓ బస్సు డ్రైవర్ కుమారుడు.. తండ్రి ఎక్కువ సేపు పనిచేస్తే కానీ పూటగడవని పరిస్థితి.. ఇవేవీ విజేందర్ ప్రతిభను అడ్డుకోలేకపోయాయి. కన్న కలలను సాకారం చేసుకునేందుకు ఎంత దూరమైనా వెళ్లొచ్చని, ఒడుదొడుకులను ఆత్మవిశ్వాసంతో ఎదుర్కోవచ్చని నిరూపించిన విజేందర్కు సెల్యూట్.
ఇవీ చూడండి:-
