ఇంగ్లండ్‌లోని బర్మింగ్‌హామ్‌ వేదికగా 2022లో కామన్వెల్త్ క్రీడలు జరగనున్న సంగతి తెలిసిందే. ఈ టోర్నీ నుంచి షూటింగ్‌ను తప్పించే ఆలోచనలో ఉన్నారు నిర్వాహకులు. ఇదే జరిగితే ఈ మెగా ఈవెంట్ను బహిష్కరిస్తామని హెచ్చరిక జారీ చేసింది భారత ఒలింపిక్ సంఘం (ఐఓఏ). దీనిపై చర్చించేందుకు వీలైనంత త్వరగా సమావేశం ఏర్పాటు చేయాలని కేంద్ర క్రీడా శాఖ మంత్రి కిరణ్‌ రిజుజుకు శనివారం లేఖ రాశారు ఐఓఏ అధ్యక్షుడు నరిందర్ బత్రా.
" 2022లో జరగనున్న కామన్వెల్త్ క్రీడల్లో పాల్గొనకుండా నిరసన తెలియజేయాలనుకుంటున్నాం. ఇలాంటి అసంబద్ధ ఆలోచనలను కచ్చితంగా వ్యతిరేకించాలి. భారత్ ఇంకా బ్రిటీష్‌ పాలనలో లేదని వారు తెలుసుకోవాలి. ప్రతిసారి భారత్ పట్టు సంపాదించిన క్రీడల్లో నిబంధనలు మారుస్తున్నారు లేదంటే అడ్డంకులు సృష్టిస్తున్నారు. ఈసారి వాటిని ప్రతిఘటించాలని నిర్ణయించుకున్నాం ".
-- నరిందర్ బత్రా, భారత ఒలింపిక్ సంఘం అధ్యక్షుడుఐఓఏ అధ్యక్షుడు నరిందర్ బత్రా
కామన్వెల్త్ క్రీడల నుంచి షూటింగ్‌ను తొలగించి.. మరో మూడు కొత్త క్రీడలను చేర్చాలని కామన్వెల్త్ క్రీడా సమాఖ్య (సీజీఎఫ్‌) జూన్లో జరిగిన సమావేశంలో ప్రతిపాదన తెచ్చింది. ఇదే జరిగితే షూటింగ్లో పతకాలు సాధించే సత్తా ఉన్న భారత్కు పెద్ద దెబ్బ తగిలినట్లే. అంతేకాకుండా పట్టికలోనూ అట్టడుగు స్థానానికే పరిమితమవుతుంది.
భారత్ పట్టు..
గతేడాది జరిగిన గోల్డ్‌కోస్ట్‌ క్రీడల్లో భారత ఆటగాళ్లు 66 పతకాలు సాధించారు. వాటిల్లో 16 షూటింగ్లో వచ్చినవే. కామన్వెల్త్ క్రీడా సంఘం నిర్ణయాన్ని వ్యతిరేకిస్తున్న భారత్... నిరసనగా సెప్టెంబరులో రువాండాలో జరగనున్న సీజీఎఫ్‌ సర్వసభ్య సమావేశంలో పాల్గొనమని చెప్పింది. అంతేకాకుండా సమాఖ్యలోని రెండు ముఖ్యమైన పదవులకు వేసిన నామినేషన్లను ఉపసంహరించుకుంది.
