జోర్డాన్లో ఇటీవలే ఆసియా ఒలింపిక్ క్వాలిఫయర్ పోటీలు జరిగాయి. వీటికి హాజరైన భారత దిగ్గజ బాక్సర్, రాజ్యసభ సభ్యురాలు మేరీకోమ్.. క్వారంటైన్ నిబంధనలను అతిక్రమించింది. ఎవరైనా విదేశాల నుంచి వస్తే, కచ్చితంగా 14 రోజులు స్వీయ నిర్బంధంలో ఉండాల్సిందేనని.. ఇప్పటికే భారత ప్రభుత్వం, ప్రపంచ ఆరోగ్య సంస్థ సూచించాయి. వాటిని బేఖాతరు చేస్తూ, రాష్ట్రపతి రామ్నాథ్ కోవింద్ ఇటీవలే ఇచ్చిన ఓ విందుకు హాజరైంది.
మార్చి 13న స్వదేశానికి వచ్చిన మేరీ.. కరోనా వ్యాప్తి నేపథ్యంలో 14 రోజులు ఐసోలేషన్లో ఉండాలి. కానీ మార్చి 18న రాష్ట్రపతి భవన్లో కోవింద్ ఇచ్చిన విందుకు హాజరైంది. తాజాగా రాష్ట్రపతి షేర్ చేసిన నాలుగు ఫొటోల్లో ఆమె కనిపించడం వల్ల ఈ విషయం వెలుగులోకి వచ్చింది. ఇందులో ఆమెతో పాటు పలువురు పార్లమెంటు సభ్యులు ఉన్నారు.
తాజాగా ఈ విషయంపై స్పందించింది మేరీకోమ్. జోర్డాన్ నుంచి వచ్చినప్పటి నుంచి ఇంట్లోనే ఉన్నట్లు చెప్పింది. అయితే రాష్ట్రపతి విందుకు వెళ్లినా, ఎవరికీ కరచాలనం ఇవ్వలేదంది.
కరోనా పాజిటివ్గా బయటపడిన సింగర్ కనికా కపూర్.. ఆ తర్వాత పలువురు ప్రముఖులను కలిసింది. ఆమెను కలిసిన బీజేపీ పార్లమెంట్ సభ్యుడు దుష్యంత్ సింగ్, రాష్ట్రపతి కోవింద్ ఇచ్చిన పార్టీకి హాజరవడం చర్చనీయాంశమైంది. ఇప్పటికే పలువురు పార్లమెంట్ సభ్యులు సహా రాష్ట్రపతికి కరోనా పరీక్షలు నిర్వహించినట్లు తెలుస్తోంది.
