జోర్డాన్‌లోని అమన్ వేదికగా జరుగుతున్న ఆసియా ఒలింపిక్స్ క్వాలిఫయర్ బాక్సింగ్‌ టోర్నీలో... భారత్ సత్తా చాటుతోంది. క్వార్టర్స్‌లో అడుగుపెట్టిన ఆశిష్ కుమార్‌ (75 కేజీలు), మనీశ్ కౌశిక్‌ (63 కేజీలు).. టోక్యో ఒలింపిక్స్‌కు బౌట్ దూరంలో నిలిచారు. గురువారం జరిగిన ప్రీ క్వార్టర్స్‌లో ఆశిష్.. 5-0 తేడాతో నాలుగో సీడ్‌ ఉముర్బెక్‌ (కిర్గిస్థాన్‌)ను చిత్తుచేశాడు. మరో పోరులో మనీశ్.. 5-0 తేడాతో చు ఎన్‌ (తైవాన్‌)పై విజయం సాధించాడు. క్వార్టర్స్‌లో ఆశిష్.. ఇండోనేషియా బాక్సర్‌ మైకేల్‌తో, మనీశ్.. చింజోరిగ్‌ (మంగోలియా)తో తలపడనున్నారు.
ఈ ఇద్దరూ సెమీస్ చేరితే టోక్యో బెర్త్ ఖరారు కానుంది. మహిళల విభాగంలో భారత్‌కు చెందిన సిమ్రన్‌జీత్‌ కౌర్‌ (60 కేజీలు), సాక్షి చౌదరి(57 కేజీలు) ఇప్పటికే క్వార్టర్‌ఫైనల్లో అడుగుపెట్టారు. ఈ టోర్నీలో మొత్తం 13 మంది భారత ఆటగాళ్లు.. టోక్యో టికెట్ కోసం బరిలోకి దిగారు.
