ఒలింపిక్స్ నిర్వహణపై భారత్ ఆసక్తి చూపిస్తోంది. 2032లో ఈ మెగాక్రీడల్ని జరిపేందుకు ఉత్సాహంగా ఉంది. అయితే ప్రస్తుతం ప్రపంచాన్ని పట్టిపీడిస్తున్న కరోనా మహమ్మరి అంతమయ్యాక.. ఈ క్రీడల నిర్వహణపై దృష్టి పెట్టనున్నామని భారత ఒలింపిక్ సంఘం అధ్యక్షుడు నరీందర్ బత్రా తెలిపారు.
"2026 యూత్ ఒలింపిక్స్తో పాటు 2032 ఒలింపిక్స్ హక్కుల కోసం తీవ్రంగా ప్రయత్నిస్తున్నాం. ఇందుకు సంబంధించిన తుది జాబితాను 2025 చివరికల్లా సిద్ధం చేస్తాం. ఈ ఏడాది తర్వాత ఓ కమిటీ వేసి, వేదికల పరిశీలన ప్రారంభిస్తాం" -నరీందర్ బత్రా, భారత ఒలింపిక్ సంఘం అధ్యక్షుడు
భారత ఒలింపిక్ సంఘం అధ్యక్షుడు నరీందర్ బత్రా
2010లో కామన్వెల్త్ గేమ్స్ నిర్వహించిన భారత్.. ఆ తర్వాత మరో మెగాటోర్నీకి ఆతిథ్యమివ్వలేదు. ఇందులో భాగంగానే ఒలింపిక్స్ కోసం బిడ్ వేసే ఆలోచనలో ఉంది. అయితే మనతో పాటే క్వీన్స్ లాండ్(ఆస్ట్రేలియా), షాంఘై(చైనా), సియోల్-ప్యాంగ్యాంగ్(దక్షిణ కొరియా)లు ఒలింపిక్స్ హక్కుల కోసం బిడ్ వేయాలని భావిస్తున్నాయి.
