Ind Vs Pak Hockey 2023 : ఆసియా ఛాంపియన్స్ ట్రోఫీ హాకీలో భాగంగా బుధవారం జరిగిన మ్యాచ్లో భారత్ అదరగొట్టింది. తమ చిరకాల ప్రత్యర్థైన పాకిస్థాన్ పై 4-0 గోల్స్‌తో ఘన విజయాన్ని సాధించింది. ఎంతో ఉత్కంఠగా జరిగిన ఈ పోరులో అద్భుత ప్రదర్శన కనబరిచిన భారత్..చివరి వరకు దూసుకెళ్లింది. భారత్ తరఫున కెప్టెన్‌ హర్మన్ప్రీత్ సింగ్ రెండు గోల్స్‌ (15వ, 23వ) కొట్టగా.. మరో ప్లేయర్ జుగ్‌రాజ్‌ సింగ్ (36వ), ఆకాశ్‌దీప్‌ సింగ్ (55వ) చెరో గోల్ను సాధించారు. అయితే మూడు గోల్స్‌ పెనాల్టీ కార్నర్ల ద్వారా వచ్చాయి. ఇక ఆకాశ్‌దీప్‌ ఫీల్డ్‌ గోల్ సాధించాడు.
అయితే పాకిస్థాన్ ఏమాత్రం పోటీ ఇవ్వలేకపోయింది. దీంతో అజేయ రికార్డు నిలబెట్టుకున్న భారత జట్టు పాయింట్ల పట్టికలో అగ్రస్థానంతో గ్రూప్‌ దశను ముగించింది. 5 మ్యాచ్‌ల్లో నాలుగు గెలిచి, ఒకదాన్ని డ్రాగా ముగించిన హర్మన్ప్రీత్ టీమ్..13 పాయింట్లు సాధించింది. ఈ క్రమంలో శుక్రవారం జరిగే సెమీఫైనల్లో జపాన్‌ను ఢీకొట్టనుంది. మరో సెమీస్‌లో మలేసియా, కొరియా తలపడతాయి.
Ind Vs Pak Hockey : మరోవైపు పాక్తో జరిగిన పోరులో భారత జట్టు ఆద్యంతం ఆధిపత్యాన్ని ప్రదర్శించింది. ఈ మ్యాచ్‌కు ముందే సెమీఫైనల్‌కు అర్హత సాధించిన ఆతిథ్య జట్టు.. మరింత ఆత్మవిశ్వాసంతో ఆడింది. తొలి క్వార్టర్‌ ఆఖరిలో లభించిన తొలి పెనాల్టీ కార్నర్‌ను హర్మన్ప్రీత్ ఓ బలమైన లో ఫ్లిక్‌తో సద్వినియోగం చేశాడు. ఇక 23వ నిమిషంలో భారత్‌కు రెండో పెనాల్టీ కార్నర్‌ లభించింది. దాన్ని కూడా హర్మన్ప్రీత్ వృథా పోనివ్వలేదు.
బలమైన డ్రాగ్‌ ఫ్లిక్‌తో పాకిస్థాన్ గోల్‌కీపర్‌ అక్మల్‌ కాళ్ల మధ్య నుంచి నెట్లోకి కొట్టి భారత్ ఆధిక్యాన్ని 2-0కు పెంచాడు. ఆ తర్వాత కూడా వరుస దాడులతో పాకిస్థాన్ రక్షణ శ్రేణిపై భారత్ తీవ్ర ఒత్తిడిని కొనసాగించింది. ఫలితంగా 30వ నిమిషంలో వరుసగా రెండు పెనాల్టీ కార్నర్‌లు లభించాయి. అయితే ఆ రెండు అవకాశాలను ఉపయోగించుకోవడంలో హర్మన్ప్రీత్ విఫలమయ్యాడు.
India Vs Pakistan Hockey : బ్రేక్కు 2-0 ఆధిక్యంలో ఉన్న భారత్.. తిరిగి ఆట మొదలైన ఆరు నిమిషాలకే 3-0 ఆధిక్యంలోకి వెళ్లింది. పెనాల్టీ కార్నర్‌ను జుగ్‌రాజ్‌ గోల్‌గా మలిచాడు. 43వ నిమిషంలో లభించిన పెనాల్టీ కార్నర్‌ను పాకిస్థాన్ వృథా చేసుకుంది. అంతకుముందు కూడా ఓ పెనాల్టీ కార్నర్‌ను ఆ జట్టు ఉపయోగించుకోలేకపోయింది. 55వ నిమిషంలో మన్‌దీప్‌ సింగ్ స్ట్రైక్‌ను అకాశ్‌దీప్‌ నెట్లోకి నెట్టడంతో భారత్ 4-0తో తిరుగులేని ఆధిక్యంలోకి వెళ్లింది.
హాకీ స్టార్ ప్లేయర్గా ఎదిగినా.. ఇంకా కటిక పేదరికమే.. గ్యాస్, నీటి కనెక్షన్ కూడా...
మెరుగైన వసతులతో 'హాకీ' పునరుజ్జీవం.. ఫ్యాన్స్లో మళ్లీ కొత్త ఆశలు!
