కరోనా కారణంగా ప్రపంచవ్యాప్తంగా స్తంభించిన క్రీడారంగం ఇప్పుడిప్పుడే కోలుకుంటోంది. ఈ నేపథ్యంలో జరగనున్న ఓ చదరంగ పోటీ ఆసక్తి రేపుతోంది. ఎందుకంటే అది భూమి, అంతరిక్షం మధ్య పోరు మరి! మంగళవారం ఈ గేమ్‌ను నిర్వహించనున్నారు. భూమి తరపున మాజీ ర్యాపిడ్‌, బ్లిట్జ్ ప్రపంచ ఛాంపియన్ సెర్గీ కర్జాకిన్ ప్రాతినిథ్యం వహించబోతున్నాడు. అంతర్జాతీయ అంతరిక్ష కేంద్రంలోని వ్యోమగాములు అనటోలీ ఇవానిషిన్, ఇవాన్ వాగ్నర్ జట్టుగా కలిసి ఈ రష్యా గ్రాండ్‌మాస్టర్‌తో తలపడబోతున్నారు. మాస్కోలోని వ్యోమగాముల స్మారక మ్యూజియంలో కూర్చుని సెర్గీ కర్జాకిన్ ఆడితే.. భూమికి 408 కిలోమీటర్ల ఎత్తులో ఉన్న అంతరిక్ష కేంద్రం నుంచి ఆ వ్యోమగాములు పావులు కదపనున్నారు.
50 ఏళ్ల కిత్రమే:
భూమి, అంతరిక్షం మధ్య చదరంగం పోటీ పెట్టాలనే ఆలోచన 50 ఏళ్ల క్రితమే పుట్టింది. 1970, జూన్‌ 9న తొలిసారి ఈ తరహా చెస్‌ గేమ్‌ను నిర్వహించారు. అప్పటి సోవియట్‌ అంతరిక్ష నౌక సోయుజ్‌-9 నుంచి వ్యోమగాములు ఆండ్రియన్‌ నికోలెవ్‌, ఇవనోవిచ్‌.. భూమిపై ఉన్న నికోలై, విక్టర్‌తో తలపడ్డారు. దాదాపు ఆరు గంటల పాటు సాగిన ఈ గేమ్‌ను రేడియో ద్వారా అనుసంధానించారు. ఆ పోరు డ్రాగా ముగిసింది. చివరగా 2008-09లో నాసా, యుఎస్‌ చెస్‌ సమాఖ్య కలిసి ఈ తరహా పోటీ నిర్వహించారు.
ఇదీ చూడండి... 'లాక్డౌన్ సమయం టీమ్ఇండియా బౌలర్లకు సదవకాశం'
