ఒలింపిక్స్ కోసం సిద్ధమవుతున్న భారత స్టార్ షూటర్ మను బాకర్.. ప్రస్తుతం యూరోపియన్ ఛాంపియన్షిప్ కోసం క్రొయేషియా వెళ్లింది. మరోవైపు తన బీఏ పరీక్షలు కోసం పుస్తకాలతో కుస్తీ పడుతోంది. తన హోటల్ గదిలో ఖాళీ సమయంలో చదువుకుంటోంది.
దిల్లీ విశ్వవిద్యాలయానికి చెందిన లేడీ శ్రీరామ్ మహిళా కళాశాలలో పొలిటికల్ సైన్స్ చదువుతోంది మను. మే 18 నుంచి అక్కడ పరీక్షలు జరగనున్నాయి. అయితే భారత బృందం అతిథిగా పాల్గొంటోన్న యురోపియన్ ఛాంపియన్షిప్.. క్రొయేషియా రాజధాని జాగ్రెబ్ లో మే 20న ప్రారంభం కానుంది. ఈ టోర్నీతో పాటు ఈమె పరీక్షలు ఏకకాలంలో జరగనున్నాయి. అయితే పరీక్షలు, పోటీలు వేర్వేరు తేదీల్లో ఉండటం మనుకు కలిసివచ్చే అంశం.
"గతంలోలానే పరీక్షలు, షూటింగ్.. రెండింటినీ పూర్తిచేస్తాను. పరీక్ష ఉన్న రోజు పోటీలు లేవు కాబట్టి ఆ పని నేను చేయగలను. ఈ ఏడాది ఒలింపిక్స్లో అత్యుత్తమ ప్రదర్శన చేసి, దేశం గర్వపడేలా చేయడంపై ప్రస్తుతం దృష్టి పెట్టాను"
- మను బాకర్, భారత షూటర్
టోక్యోలో జులై 23 నుంచి ఆగస్టు 8 వరకు ఒలింపిక్స్ జరగనున్నాయి. 19 ఏళ్ల మను బాకర్ ఇందులోని 3 ఈవెంట్లలో పాల్గొననుంది.
ఇదీ చూడండి: మహిళల 25మీ పిస్టల్ విభాగంలో భారత్కు స్వర్ణం
