దిల్లీ వేదికగా జరుగుతున్న ఆసియా రెజ్లింగ్ ఛాంపియన్షిప్లో భారత క్రీడాకారులు అదరగొట్టేశారు. పలు విభాగాల్లో నలుగురు రెజ్లర్లు ఫైనల్కు చేరారు. భజరంగ్ పునియా(65 కేజీలు), రవి దహియా(57 కేజీలు), సత్యవర్త్ కడియన్(97 కేజీలు), గౌరవ్ బలియన్(79 కేజీలు) ఉన్నారు. వీరు ఇప్పటికే రజతాలు ఖాయం చేసుకున్నారు.
భజరంగ్ ఫామ్
టోక్యో ఒలింపిక్స్ ముందు జరుగుతున్న ఈ మెగాటోర్నీలో సత్తా నిరూపించుకున్నాడు భజరంగ్. ఆసియా గేమ్స్లో పసిడి గెలిచిన ఇతడు.. వరుసగా ముగ్గురు స్టార్ రెజ్లర్లను ఓడించాడు. తొలుత షరిఫోవ్(తజకిస్థాన్), క్వార్టర్స్లో అబ్బోస్ రక్మనోవ్(ఉజ్బెకిస్థాన్), సెమీస్లో అమిర్ హొస్సేన్(ఇరాన్)ను ఓడించి ఫైనల్ చేరాడు. ముగ్గురిపైనా తిరుగులేని ఆధిపత్యం ప్రదర్శించాడు. తుది పోరులో 2018 వరల్డ్ ఛాంపియన్ టకుటో ఒటోగురో(జపాన్)తో తలపడనున్నాడు.
>> రవి దహియా.. ప్రపంచ ఛాంపియన్షిప్ కాంస్య విజేత నూరిస్లామ్ సనయవ్(కజకిస్థాన్)పై సెమీఫైనల్లో గెలిచాడు. ఫైనల్లో హిక్మతుల్లో(తజకిస్థాన్)తో అమీతుమీ తేల్చుకోనున్నాడు.
>> సత్యవర్త్ కడియన్.. సెమీస్లో రస్టమ్ ఇస్కాందరీ(తజకిస్థాన్)పై గెలిచాడు. ఫైనల్లో ఇరాన్ ఆటగాడు మోజటబాతో పోటీకి సిద్ధమవుతున్నాడు.
>> గౌరవ్ బలియన్.. జపాన్ రెజ్లర్ షింకిచి ఒకుయ్ను ఓడించి ఫైనల్ చేరాడు. ఫైనల్లో అర్సలన్ (కిర్గిస్థాన్)తో అమీతుమీ తేల్చుకోనున్నాడు.
ఐదు విభాగాల్లో నలుగురు తుదిపోరు అర్హత సాధించడం విశేషం. నవీన్(70కేజీల) ఒక్కడే సెమీఫైనల్లో ఓడిపోయాడు. కాంస్య పోరులో అషిరోవ్(ఉజ్బెకిస్థాన్)తో తలపడనున్నాడు.
