దుబాయ్ వేదికగా జరుగుతోన్న ఆసియన్ బాక్సింగ్ ఛాంపియన్షిప్లో భారత బాక్సర్ శివ థాప(64 కేజీ) వరుసగా ఐదో పతకాన్ని ఖాయం చేసుకున్నాడు. క్వార్టర్స్లో కువైట్ బాక్సర్ నాదర్ ఓడాపై 5-0 తేడాతో విజయం సాధించాడు. ఈ విజయంతో సెమీస్లోకి దూసుకెళ్లిన థాప.. ఈ సీజన్లో ఏదో ఒక పతకాన్ని గెలుపొందనున్నాడు.
మరో పోటీలో మహమ్మద్ హుసాముద్దీన్(56 కేజీ) పరాజయం పాలయ్యాడు. క్వార్టర్ ఫైనల్లో ఉజ్బెకిస్థాన్ బాక్సర్ మిరాజిజ్బెక్ మిర్జాహాలిలోవ్తో జరిగిన పోరులో 1-4తో ఓడిపోయాడు. ఆసియన్ గేమ్స్ ఛాంపియన్ అయిన మిరాజిజ్బెక్.. తీవ్రమైన పంచ్లతో ప్రత్యర్థికి అవకాశం ఇవ్వలేదు. హుసాముద్దీన్ ఒకట్రెండు పంచ్లతో పోటీలోకి వచ్చే ప్రయత్నం చేసినప్పటికీ ఫలితం లేకుండా పోయింది.
సోమవారం రాత్రి జరిగిన మరో పోటీలో భారత బాక్సర్ సుమిత్ సంగ్వాన్(81 కేజీ).. ఇరాన్ బాక్సర్ మేసం ఘెస్లాగి చేతిలో ఓడిపోయాడు. ఇక బుధవారం జరగనున్న పోటీల్లో అమిత్ పంగాల్, వికాస్ క్రిష్ణన్, ఆశీష్ కుమార్ తమ అదృష్టాన్ని పరీక్షించుకోనున్నారు. మంగోలియా బాక్సర్ ఖార్ఖు ఎన్ఖ్మండఖ్తో పంగాల్ తలపడనున్నాడు.
ఇదీ చదవండి: మొహాలీ స్టేడియానికి దిగ్గజ హాకీ ఆటగాడి పేరు
