వచ్చే ఏడాది జరిగే టోక్యో ఒలింపిక్స్లో భారత పురుషుల హాకీ జట్టుకు పూల్-ఏలో చోటు దక్కింది. డిఫెండింగ్ ఛాంపియన్ అర్జెంటీనాతో పాటు స్పెయిన్, న్యూజిలాండ్, ఆతిథ్య జపాన్ లాంటి శక్తిమంతమైన టీమ్లతో హాకీ టీమిండియా తలపడనుంది.
పూల్-బిలో బెల్జియం, నెదర్లాండ్స్, జర్మనీ, గ్రేట్ బ్రిటన్, కెనడా, దక్షిణాఫ్రికా జట్లు ..విశ్వక్రీడల్లో అమీతుమీ తేల్చుకోనున్నాయి.
ప్రపంచ ఐదో ర్యాంకులో ఉన్న భారత్.. ఈ నెల ప్రారంభంలో జరిగిన అర్హత పోటీల్లో రష్యాను 11-3 తేడాతో ఓడించి ఒలింపిక్స్ బెర్తు ఖరారు చేసుకుంది.
అమ్మాయిలు కూడా పూల్-ఏలోనే
భారత మహిళా హాకీ జట్టు.. పూల్-ఏలోనే చోటు దక్కించుకుంది. ఈ పూల్లో డిఫెండింగ్ ఛాంపియన్ గ్రేట్ బ్రిటన్, ప్రపంచ నెంబర్ వన్ నెదర్లాండ్స్, జర్మనీ, ఐర్లాండ్, దక్షిణాఫ్రికా లాంటి బలమైన జట్లను ఢీ కొట్టనుంది.
మహిళల పూల్-బిలో ఆస్ట్రేలియా, అర్జెంటీనా, న్యూజిలాండ్, స్పెయిన్, చైనా, జపాన్ జట్లు పరస్పరం తలపడనున్నాయి. ప్రపంచ 9వ ర్యాంకులో ఉన్న భారత మహిళల జట్టు.. అర్హత పోటీల్లో అమెరికాపై 6-5 తేడాతో నెగ్గి ఒలింపిక్స్లో చోటు దక్కించుకుంది.
అంతర్జాతీయ హాకీ ఫెడరేషన్(ఎఫ్ఐహెచ్) ర్యాంకింగ్స్ ఆధారంగా టాప్-16లో నిలిచిన జట్లు.. ఒలింపిక్స్లో తలపడతాయి.
వచ్చే ఏడాది జరిగే ఒలింపిక్స్లో జులై 25 నుంచి ఆగస్టు 7వరకు హాకీ మ్యాచ్లు జరగనున్నాయి.
ఇదీ చదవండి: పింక్ టెస్టు: దాదాపై మాజీల ప్రశంసల వర్షం
