హాకీ అనగానే ముందుగా గుర్తొచ్చే పేరు మేజర్ ధ్యాన్చంద్. భారత్కు వరుసగా 1928, 1932,1936 ఒలింపిక్స్లో స్వర్ణం తెచ్చిన దిగ్గజం ఆయన. 'హాకీ విజర్డ్'గా బిరుదు పొందిన ధ్యాన్చంద్ 41 వర్ధంతి (గురువారం) సందర్భంగా.. మాజీ హాకీ ఆటగాడు అబ్దుల్ అజిజ్తో ఈటీవీ భారత్ ప్రత్యేక ఇంటర్వ్యూ మీకోసం..
గురువారం ధ్యాన్చంద్ 41వ వర్ధంతి. ఆయనను మీరు ఎలా గుర్తుపెట్టుకుంటారు?
ధ్యాన్చంద్ హాకీ దిగ్గజం. ఆయన భారత్ కోసం వరుసగా మూడు ఒలింపిక్ స్వర్ణాలు గెలిచారు. ప్రతి ఒక్కరికీ ఆయన గుర్తుండిపోతారు. దేశం గర్వపడేలా చేసిన వ్యక్తి ఆయన.
ఆయనతో మీకున్న అనుభవాలేంటి?
1975లో ధ్యాన్చంద్ తనయుడు అశోక్ ధ్యాన్చంద్ సారథ్యంలో భారత్ హాకీ ప్రపంచకప్ గెలిచింది. అప్పుడు ఝూన్సీలో ప్రజలు సంబరాలు చేసుకుంటున్నారు. మానాన్న హాకీ ఆటగాడు కనుక అశోక్ గారిని కలిసే అవకాశం నాకు లభించింది. అప్పడే నేను 'హాకీ దిగ్గజాన్ని' చూశా. నువ్వేం అవుతావ్ అని ధ్యాన్ చంద్ నన్ను అడిగారు. అప్పుడు నేను హాకీ ఆడతా అని చెప్పా. ఝూన్సీ పేరు నిలబెట్టాలని చిరునవ్వుతో ఆయన సమాధానం చెప్పారు.
ధ్యాన్చంద్ ప్రాంతం నుంచి వచ్చి మీరూ ఆటగాడిగా ఎదిగారు. మరి ఆ ప్రాంతం ఇంకా ధ్యాన్చంద్ను స్మరించుకుంటోందా?
ఒకప్పుడు హాకీ ఆట అంటే ఒక సంచలనం. ఇప్పుడు ఆ దాఖలాలు కనిపించడంలేదు. ప్రస్తుతం ఉన్న ఆటగాళ్లు సొంత లాభాల కోసం ఆడుతున్నట్లుగా అనిపిస్తుంది. ధ్యాన్చంద్ హాకీకే కాదు ఇతర ఆటగాళ్లకూ ఆదర్శంగా నిలిచారు. అందరి నుంచి గౌరవం పొందారు. మా ప్రాంతానికి ఝూన్నీ రాణి లక్ష్మీభాయి ఒక ఎత్తు అయితే మేజర్ ధ్యాన్చంద్ మరో ఎత్తు.
2013లో సచిన్కు భారతరత్న లభించడంపై మీ అభిప్రాయం ఏమిటి?
భారతరత్న పురస్కారానికి ముందు మీడియా ఓ సర్వే నిర్వహించింది. మేజర్ ధ్యాన్చంద్కే భారతరత్న ఇవ్వాలని ప్రజలందరూ అభిప్రాయపడ్డారని ఆ సర్వేలో తేలింది. కానీ, ప్రభుత్వ వ్యూహం ఎలా ఉందో తెలియదు. సచిన్కు భారతరత్న ఇచ్చింది. ఈ విషయం చాలా మందిని ఆశ్చర్యానికి గురిచేసింది. మీడియా ఇప్పటికీ ధ్యాన్చంద్కు అత్యున్నత పురస్కారం రావాలని ప్రభుత్వానికి గుర్తుచేస్తోంది.
