ఈ ఏడాది మేటి ఫుట్బాల్ ఆటగాడు పురస్కారానికి పది మంది క్రీడాకారులను నామినేట్ చేసింది అంతర్జాతీయ ఫుట్బాల్ ఫెడరేషన్(ఎఫ్ఐఎఫ్ఏ). ఇందులో పోర్చుగల్ వీరుడు క్రిస్టియానో రొనాల్డో, అర్జెంటీనా స్టార్ లియోనల్ మెస్సీ ఉన్నారు. ఉత్తమ ఆటగాడు ఎవరనేది సెప్టెంబర్ 23న మిలాన్లో జరిగే ఫిఫా అవార్డుల వేడుకల్లో ప్రకటిస్తారు.
ప్రత్యర్థులుగా మైదానంలో అమీతుమీ తేల్చుకునే రొనాల్డో, మెస్సీల్లో ఉత్తమ ఆటగాడిగా ఎవరు నిలుస్తారనేది ఆసక్తికరంగా మారింది. మాంచెస్టర్ సిటీ స్టార్గా గుర్తింపు పొందిన పొర్చుగల్ ఆటగాడు బెర్నార్డో సిల్వాకు ఈ జాబితాలో చోటుదక్కకపోవడం గమనార్హం.
యూఈఎఫ్ఏ ఛాంపియన్ లివర్పూల్ జట్టు ఆటగాళ్లు సాడియో మేన్, హ్యారీ కేన్, కైలియాన్ నామినేటెడ్ లిస్టులో ఉన్నారు. మహిళల జాబితాలో అమెరికన్ స్ట్రైకర్ మెగన్ రాపినోయి, అలెక్స్ మోర్గాన్, జూలీ ఎట్జ్ లాంటి స్టార్ ప్లేయర్లు ఈ జాబితాలో చోటు దక్కించుకున్నారు.
జాతీయ జట్ల సారథులు, కోచ్లు, ఎంపిక చేసిన మీడియా ప్రతినిధులు, అభిమానుల ఓట్ల ద్వారా ప్రపంచ ఉత్తమ ఆటగాడిని ఎంపిక చేస్తుంది ఫిఫా. ఒక్కొక్కరికి 25 శాతం ఓట్ల వెయిటేజీ ప్రకారం ఈ ఏటి మేటి క్రీడాకారుడు ఎవరో తేల్చనుంది.
ఇది చదవండి: మయాంక్ను వదులుకున్న ముంబయి ఇండియన్స్
