ప్రముఖ బాక్సర్ మేరీకోమ్ నుంచి చాలా విషయాల్లో స్ఫూర్తి పొందానని భారత మహిళా స్టార్ ఫుట్బాలర్ బాలాదేవి చెప్పింది. 2014 ఆసియా క్రీడల సందర్భంగా ఆమెతో మాట్లాడిన క్షణాల్ని గుర్తు చేసుకుంది.
"మేరీకోమ్ నాకెన్నో విషయాల్లో స్ఫూర్తి. ఎలాంటి వసతులు లేని చోటు నుంచి వచ్చి శ్రమ, పట్టుదలతో ఎన్నో రికార్డులు సృష్టించింది. తల్లి అయిన తర్వాత కూడా ఆ రికార్డుల పరంపరను కొనసాగిస్తోంది. మేం 2014 ఆసియా క్రీడల సమయంలో కలిశాం. అప్పుడే ఆమె శిక్షణ విధానాన్ని చూశాను. ఎంతో స్నేహంగా ఉండే మేరీ.. మా పోటీలప్పుడు చాలా సహాయం చేశారు" -బాలా దేవి, ప్రముఖ ఫుట్బాలర్
స్కాట్లాండ్ ఉమెన్ ప్రీమియర్ లీగ్లో ఆడే అవకాశం దక్కించుకున్న భారత తొలి మహిళా ఫుట్బాలర్గా బాలాదేవి గుర్తింపు తెచ్చుకుంది. ఈ ఏడాది జనవరిలో ఆ లీగ్లోని రేంజర్స్ జట్టుతో 18 నెలల ఒప్పందం కూడా కుదుర్చుకుంది. అలానే ఏఎఫ్సీ ఇంటర్నేషనల్ ప్లేయర్ ఆఫ్ ది వీక్ నామినేషన్లలోనూ స్టార్ ప్లేయర్ల సరసన చోటు దక్కించుకుంది. అయితే తన ఎదుగుదలలో ఆల్ ఇండియా ఫుట్బాల్ ఫెడరేషన్ కీలక పాత్ర పోషించిందని బాలా దేవి చెప్పింది.
