ఫుట్బాల్ ఆటగాళ్లంటే మొదట గుర్తొచ్చే పేర్లు.. మెస్సీ, రొనాల్డో. తమ ఆటతో.. ప్రపంచవ్యాప్తంగా ఎందరో అభిమానులను సంపాదించుకున్నారు. అయితే.. రొనాల్డో కంటే ఓ మెట్టుపైనే ఉంటాడు అర్జెంటీనా దిగ్గజం, బార్సిలోనా స్టార్ లియోనల్ మెస్సీ. రొనాల్డోకు సాధ్యం కాని ఎన్నో ఘనతల్ని సాధించి.. సాకర్లో రారాజుగా పేరు గడించాడు. గురువారం(జూన్ 24) 34వ పడిలోకి అడుగుపెట్టిన సందర్భంగా.. మెస్సీ జీవిత విశేషాలు మీకోసం.
లియోనల్ మెస్సీ.. 1987 జూన్ 24న అర్జెంటీనా రోసారీలో జన్మించాడు. దేశ జాతీయ ఫుట్బాల్ జట్టుకు ఆడుతున్నప్పటికీ.. స్పానిష్ ఫుట్బాల్ క్లబ్ బార్సిలోనాతోనే ఎక్కువ ప్రాచుర్యం పొందాడు. ఆ క్లబ్తో అతడికి విడదీయరాని అనుబంధం ఉంది.
వైద్యం ఖర్చులు భరించి..
11 ఏళ్ల వయసులో హార్మోన్ లోపం అతడిని ఇబ్బంది పెట్టింది. చికిత్స కోసం నెలకు 900 డాలర్లు కట్టాలి. ఆ సమయంలో.. ఫుట్బాల్ క్లబ్ బార్సిలోనా కాంట్రాక్టుపై సంతకం చేస్తేనే వైద్యానికి డబ్బులు వస్తాయి. ఏం ఆలోచించకుండా.. కాంట్రాక్టు కుదుర్చుకున్నాడు. అతని వైద్యానికి అయిన ఖర్చులను క్లబ్ చెల్లించింది.
2003లో తొలిసారి బార్సిలోనా క్లబ్ (స్పెయిన్)తరఫున అరంగేట్రం చేశాడు. అప్పుడతని వయసు 17 ఏళ్లే.
2017లో ఆంటోనెల్లా రోకుంజోను వివాహం చేసుకున్న మెస్సీకి.. ముగ్గురు కుమారులు.
మెస్సీ ఘనతలు..
- ఫుట్బాల్లో అత్యంత ప్రతిష్టాత్మకంగా భావించే నాలుగు అవార్డులు( బాలన్ డీ ఓర్, ఫిఫా వరల్డ్ ప్లేయర్, పిచిచీ ట్రోఫీ, గోల్డెన్ బూట్) అందుకున్న ఏకైక ఆటగాడు మెస్సీ. 2009-10 సీజన్లో ఇది సాధించాడు.
- అత్యుత్తమ ఫుట్బాల్ ఆటగాడికి ఇచ్చే బాలన్ డీ ఓర్ను అవార్డును ఏకంగా ఆరుసార్లు అందుకున్న ఏకైక ఆటగాడు. 2009,10,11,12,15,19లలో దీనిని సొంతం చేసుకున్నాడు. పోర్చుగల్ స్టార్ క్రిస్టియానో రొనాల్డో 5 సార్లు సాధించి.. మెస్సీ వెనుక ఉన్నాడు.
- యూరో లీగ్లో అత్యధిక గోల్స్ చేసిన ఆటగాడికిచ్చే గోల్డెన్ షూను కూడా ఆరుసార్లు పొందిన ఏకైక ఆటగాడు మెస్సీనే.
- ఒక క్యాలెండర్ ఇయర్లో ఎక్కువ గోల్స్ చేసిన ఆటగాడు మెస్సీనే. 2012లో లా లిగా ఫుట్బాల్ లీగ్లో 59, ఛాంపియన్స్ లీగ్లో 13, జాతీయ జట్టు తరఫున 12, ఇతర టోర్నీల్లో 7 ఇలా మొత్తం 91 గోల్స్ చేశాడు.
- ఒక క్లబ్ తరఫున ఎక్కువ గోల్స్ చేసింది మెస్సీనే. బార్సిలోనాకు ఆడుతూ.. ఇప్పటివరకు 672 గోల్స్ చేశాడు. బ్రెజిల్ లెజెండ్ పీలేనే(643) అధిగమించాడు. చిన్న వయసులో తొలి గోల్, 100వ గోల్, 200వ గోల్ చేసింది మెస్సీనే.ఆరుసార్లు బాలన్ డీ ఓర్ అవార్డు
మెస్సీ గురించి చాలా మందికి తెలియనివి..
- మైదానంలో మెస్సీ వేగం, చురుకుదనం కారణంగా.. అతడిని 'ది ఫ్లీ' అని కూడా పిలుస్తుంటారు.
- ప్రపంచ ఫుట్బాల్ ఆటగాళ్లలో అత్యంత ధనవంతుడు మెస్సీనే. అతని ఆస్తి 126 మిలియన్ డాలర్లు.
- ఆటతోనే కాకుండా.. ఎన్నో ఉదార కార్యక్రమాలతోనూ ఎక్కువగా వార్తల్లో నిలిచాడు.
- తొలిసారి మెస్సీ నైపుణ్యాలు, ఆటను మెచ్చిన బార్సిలోనా డైరెక్టర్ కార్లెస్ రియాచ్.. వెంటనే కాంట్రాక్టు కుదుర్చుకున్నాడు. అప్పట్లో పేపర్ అందుబాటులో లేకుంటే టిష్యూ పేపర్పైనే కాంట్రాక్ట్ సంతకం చేశాడు.
- బార్సిలోనా తరఫున అత్యంత చిన్న వయసులో(17) గోల్స్ చేసిన ఆటగాడిగా నిలిచాడు.
- ఇతనికి రెండు పాస్పోర్ట్లున్నాయి. అర్జెంటీనా సహా స్పెయిన్లో అతడికి పౌరసత్వం ఉంది.
- బ్రెజిల్ దిగ్గజ ఫుట్బాల్ ఆటగాడు.. రొనాల్డినో నుంచి 2008లో జెర్సీ నెం.10ను పొందాడు.
- 2009లో తొలిసారి ఫిఫా వరల్డ్ ప్లేయర్ ఆఫ్ ది ఇయర్ అవార్డు అందుకున్నాడు.
- అర్జెంటీనా జాతీయ జట్టుకు ఆడే మెస్సీని.. స్పెయిన్ తరఫున ఆడాలని ఆ దేశం కోరినా సున్నితంగా తిరస్కరించాడు.
- పిల్లలకు మంచి విద్య, వైద్య సదుపాయాల కోసం.. లియో మెస్సీ అనే ఫౌండేషన్ను స్థాపించాడు.
- యూనిసెఫ్ గుడ్విల్ అంబాసిడర్గానూ ఉన్నాడు మెస్సీ.
అర్జెంటీనా జాతీయ జట్టు తరఫున ఫుట్బాల్ ప్రపంచకప్ను మాత్రం ముద్దాడలేకపోయాడు మెస్సీ. ఇదొక్కటి సాధిస్తే.. అతని కెరీర్ పరిపూర్ణం అనడం ఏమాత్రం అతిశయోక్తి కాదు.
ఇవీ చదవండి: బుమ్రా బౌలింగ్ సీక్రెట్పై ఐసీసీ వీడియో
