దాదాపు రెండేళ్లుగా జరుగుతోన్న టెస్టు ఛాంపియన్షిప్ తుది అంకానికి చేరుకుంది. శుక్రవారం నుంచి భారత్-న్యూజిలాండ్ మధ్య ఫైనల్ జరగనుంది. రెండు జట్లూ మొదటి నుంచి ప్రత్యర్థి జట్లపై ఆధిపత్యం చెలాయిస్తూ ఇక్కడివరకూ వచ్చాయి. ఈ పోరులోనూ గెలిచి టైటిల్ కొట్టేయాలని చూస్తున్నాయి. అందుకోసం పక్కా ప్లాన్స్ వేస్తున్నాయి. ఈ సందర్భంగా ఇరుజట్ల ముఖాముఖి రికార్డులపై ఓ లుక్కేద్దాం.
హెడ్ టూ హెడ్
ఇంగ్లీష్ గడ్డపై రెండు అగ్రశ్రేణి జట్లు టెస్టు ఛాంపియన్షిప్ టైటిల్ కోసం పోటీపడుతుండటం వల్ల ఈ మ్యాచ్కు ప్రాధాన్యం సంతరించుకుంది. ఇప్పటివరకు ఇరుజట్ల మధ్య 59 మ్యాచ్లు జరగ్గా భారత్ 21 మ్యాచ్లు, న్యూజిలాండ్ 12 మ్యాచ్ల్లో విజయం సాధించింది. 26 మ్యాచ్లు డ్రాగా ముగిశాయి.
టాప్ ఇన్నింగ్స్
బ్యాట్తో
భారత్-ఇంగ్లాండ్ మధ్య టెస్టుల్లో రాహుల్ ద్రవిడ్ ఎక్కువ పరుగులు చేసిన బ్యాట్స్మన్. కివీస్పై 15 మ్యాచ్లాడి 63.80 సగటుతో 1659 పరుగులు నమోదు చేశాడు. ఇందులో ఆరు శతకాలు, ఆరు అర్ధశతకాలు ఉన్నాయి.
భారత్పై టెస్టుల్లో కివీస్ తరఫున బ్రెండన్ మెక్కలమ్ ఎక్కువ పరుగులు చేశాడు. మన జట్టుపై 10 మ్యాచ్లాడి 68 సగటుతో 1224 పరుగులు సాధించాడు. ఇందులో నాలుగు సెంచరీలు, రెండు అర్ధశతకాలు ఉన్నాయి.
ప్రస్తుతం ఉన్న ఆటగాళ్లలో రెండు జట్ల మధ్య జరిగిన మ్యాచ్ల్లో విరాట్ కోహ్లీ అత్యధిక పరుగులు సాధించాడు. కివీస్పై 51.53 సగటుతో ఇప్పటివరకు 773 పరుగులు చేశాడు. ఇందులో మూడు సెంచరీలు, మూడు అర్ధశతకాలూ ఉన్నాయి. న్యూజిలాండ్ తరఫున రాస్ టేలర్ ఎక్కువ పరుగులు చేశాడు. భారత్పై 33.83 సగటుతో 812 పరుగులు నమోదు చేశాడు.
బంతితో
ఇరుజట్ల మధ్య పోరులో కివీస్ బౌలర్ రిచర్డ్ హెడ్లీ ఎక్కువ వికెట్లు తీసిన బౌలర్గా నిలిచాడు. కుడి చేతి పేసర్ అయిన ఇతడు 65 వికెట్లు పడగొట్టాడు. బిషన్ సింగ్ బేడీ(భారత్) 12 మ్యాచ్ల్లో 57 వికెట్లు తీశాడు.
ప్రస్తుత బౌలర్లలో న్యూజిలాండ్ పేసర్ టిమ్ సౌథీ భారత్పై ఎక్కువ వికెట్లు తీసినవాడు. 8 మ్యాచ్ల్లో 39 వికెట్లు దక్కించుకున్నాడు. భారత్ తరఫున అశ్విన్ కివీస్పై 48 వికెట్లు పడగొట్టాడు.
భారత్-కివీస్ చివరి మ్యాచ్ ఫలితం
గతేడాది ఓవల్ వేదికగా జరిగిన టెస్టులో టీమ్ఇండియాను మట్టికరిపించింది న్యూజిలాండ్. ఈ మ్యాచ్ మూడురోజుల్లోనే ముగిసింది. ఈ పోరులో తొలుత బ్యాటింగ్ చేసిన భారత్.. మొదటి ఇన్నింగ్స్లో 242 పరుగులకు ఆలౌటైంది. కివీస్ 235 పరుగులకే పరిమితమై టీమ్ఇండియాకు ఆధిపత్యం కట్టబెట్టింది. రెండో ఇన్నింగ్స్లో సౌథీ, బౌల్ట్ రెచ్చిపోవడం వల్ల కోహ్లీసేన 124 పరుగులకే చాపచుట్టేసింది. ఈ ఇన్నింగ్స్లో పుజారా చేసిన 24 పరుగులే అత్యధికం. అనంతరం 132 పరుగుల లక్ష్యాన్ని 3 వికెట్లు కోల్పోయి ఛేదించి గెలిచింది కివీస్.
