వరల్డ్​ కప్​లో కొత్త మెరుపులు - సీనియర్స్​ ఉన్నా యంగ్​ ప్లేయర్ల హవా!

World Cup 2023 Young Cricketers : 2023 వన్డే ప్రపంచకప్‌లో ఎంతో మంది స్టార్‌ ఆటగాళ్లు, సీనియర్​ ప్లేయర్లు అంచనాలకు తగ్గట్లే రాణిస్తున్నారు. అటు బ్యాటింగ్‌తో పాటు ఇటు బౌలింగ్‌తోనూ మెరుపులు మెరిపిస్తున్నారు. అయితే వీరి మధ్య కొత్త ప్లేయర్లు కూడా తక్కువేమీ కాదంటూ చెలరేగుతున్నారు. ఇంతకీ వారెవరంటే..

World Cup 2023 Young Cricketers : ఈ ఏడాది వన్డే ప్రపంచకప్‌లో స్టార్‌ ఆటగాళ్లు, సీనియర్లు చాలామంది అంచనాలకు మించి రాణిస్తున్నారు. బ్యాటింగ్‌లో, బౌలింగ్‌లో తమ సత్తా చాటి మెరుపులు మెరిపిస్తున్నారు. మంచి ఫామ్​ను ప్రదర్శిస్తున్నారు. అయితే వీరి మధ్య ఇప్పుడే అరంగేట్రం చేసిన క్రికెటర్లు కూడా తక్కువేమీ కాదు. తొలిసారి ప్రపంచకప్‌లో అడుగుపెట్టిన యువ ఆటగాళ్లు కూడా అంచనాలకు మించి రాణిస్తున్నారు. టోర్నీపై తమదైన ముద్ర వేస్తూ.. అభిమానుల దృష్టిలో పడుతున్నారు. ఈ నేపథ్యంలో ఆ స్టార్​ ఆటగాళ్లు ఎవరంటే..

1. న్యూజిలాండ్‌లో స్థిరపడ్డ భారత సంతతి ప్లేయర్​ రచిన్‌ రవీంద్ర.. అటు బ్యాటింగ్​తో పాటు ఇటు బౌలింగ్​లోనూ చెలరేగుతున్నాడు. ప్రధానంగా స్పిన్నర్‌.. కానీ మిడిలార్డర్లో బ్యాటింగ్‌ చేసేవాడు. అయితే ఈ ప్రపంచకప్​లో కివీస్​ జట్టు రచిన్​కు టాప్‌ ఆర్డర్లో ఆడించి చూసింది. వారి అంచనాలను మించి ఆడి రికార్డుకెక్కాడు. టోర్నీలో మూడో స్థానంలో బరిలోకి దిగుతున్న రచిన్​.. ఇప్పటి వరకు ఆడిన మ్యాచుల్లో ఏకంగా మూడు శతకాలు బాదాడు. ఆస్ట్రేలియా, ఇంగ్లాండ్‌, పాకిస్థాన్‌ లాంటి బలమైన టీమ్స్​ మీదే అతను ఈ శతకాలు సాధించడం విశేషం. ముఖ్యంగా ఆస్ట్రేలియా, పాకిస్థాన్‌లపై ఛేదనలో తీవ్ర ఒత్తిడి ఉన్నప్పటికీ.. సెంచరీలు కొట్టి తన బ్యాటింగ్‌ ప్రతిభను చాటుకున్నాడు. బంతితో ఎక్కువ వికెట్లు తీయకపోయినప్పటికీ.. పొదుపుగా బౌలింగ్‌ చేస్తూ జట్టుకు సహకారంగా ఉంటున్నాడు. 9 మ్యాచ్‌ల్లో 70.62 సగటుతో 565 పరుగులు సాధించి టోర్నీలో టాప్‌-2 స్కోరర్‌గా నిలిచాడు. ఇప్పటి వరకు టోర్నీలో రచిన్​ 3 శతకాలు, 2 అర్ధశతకాలు సాధించాడు.
2. 2023 వరల్డ్ కప్​లో సౌతాఫ్రికా సెమీస్‌ చేరడంలో ఆ జట్టులో ఓ ప్లేయర్​ది కీలక పాత్ర ఉంది. అతనే మార్కో జాన్సన్‌. బౌలింగ్‌లో రబాడ, ఎంగిడి లాంటి సీనియర్​ ప్లేయర్ల కంటే అతడి బౌలింగ్‌ను ఎదుర్కోవడమే ప్రత్యర్థి బ్యాటర్లకు సవాలుగా మారింది. ఆరంభంలోనే వికెట్లు పడగొడుతూ ప్రత్యర్థులకు చుక్కలు చూపిస్తున్నాడు. 8 మ్యాచ్‌ల్లో అతను 24.41 సగటుతో 17 వికెట్లు పడగొట్టాడు. ఇక టోర్నీలో అత్యధిక వికెట్ల తీసిన స్టార్స్​లో జాన్సన్‌ నాలుగో స్థానంలో ఉన్నాడు. ఆరున్నర అడుగుల కంటే ఎక్కువ ఎత్తున్న జాన్సన్‌.. మీదికి దూసుకొచ్చేలా, బ్యాటర్లు ఆడలేని విధంగా బంతులు సంధిస్తూ చెలరేగుతున్నాడు. అటు బౌలింగ్​తోనే కాదు ఇటు బ్యాటింగ్‌తోనూ జట్టుకు బాగా ఉపయోగపడుతున్నాడు. లోయర్‌ మిడిలార్డర్లో ఆడుతూ టోర్నీలో 157 పరుగులు సాధించాడు. ఇంగ్లాండ్‌పై 42 బంతుల్లో 75 పరుగుల మెరుపు ఇన్నింగ్స్‌ అతని కెరీర్​లో ప్రత్యేకమైనది.
3. శ్రీలంక జట్టు చెందిన యంగ్​ పేసర్‌ దిల్షాన్‌ మదుశంక బౌలింగ్​తో అదరగొడుతున్నాడు. జట్టు ఘోరంగా విఫలమైన మ్యాచ్‌ల్లోనూ అత్యద్భుతంగా ఆడుతున్నాడు. భారత్‌తో జరిగిన మ్యాచ్‌లో లంక జట్టు 55 పరుగులకే ఆలౌటైనప్పటికీ.. ఆ మ్యాచ్‌లోనూ మదుశంక 5 వికెట్లతో మెరిశాడు. న్యూజిలాండ్‌, ఇంగ్లాండ్‌తో మ్యాచ్‌ తప్ప అన్నింట్లోనూ కనీసం 2 వికెట్లు పడగొట్టాడు. టోర్నీలో అత్యధిక వికెట్ల వీరుడు కూడా దిల్షానే కావడం విశేషం. ఆడిన 9 మ్యాచ్‌ల్లో 25 సగటుతో 21 వికెట్లు పడగొట్టాడు. ప్రస్తుతం అతని ఎకానమీ 6.70. అయిదు వికెట్ల ప్రదర్శన చేసిన మదుశంక.. మరో మ్యాచ్‌లో 4 వికెట్లు పడగొట్టాడు.
4. ఈ ఏడాది వన్డే ప్రపంచకప్​లో అఫ్గానిస్థాన్‌ జట్టు సూపర్ ఫామ్​లో ఉంది. ముఖ్యంగా బౌలింగ్‌, స్పిన్లతో బడా బడా జట్లకే సవాళ్లు విసురుతూ వచ్చింది. ఇక బౌలర్లు ఎప్పట్లాగే రాణిస్తుంటే.. ఆ జట్టు బ్యాటర్లు కూడా అంచనాలను మించి రాణించారు. ఇక బ్యాటింగ్​ విభాగాన్ని ముందుండి నడిపించింది మాత్రం ఆ జట్టు యంగ్​ ప్లేయర్​ ఇబ్రహీం జాద్రానే. యంగ్​ ఓపెనర్‌ ఇచ్చిన ఆరంభాలే జట్టు సంచలన విజయాల్లో కీలకంగా మారాయి. టోర్నీలోని ప్రతి మ్యాచ్‌లోనూ రెండంకెల స్కోర్లు చేశాడు ఇబ్రహీం. పాకిస్థాన్‌పై జరిగిన మ్యాచ్​లో 87 పరుగుల ఉత్తమ ఇన్నింగ్స్‌తో జట్టును గెలిపించాడు. ఆస్ట్రేలియాపై ఏకంగా సెంచరీ బాది అందరినీ అబ్బురపరిచాడు. ప్రపంచకప్‌లో సెంచరీ చేసిన తొలి అఫ్గానిస్థాన్‌ బ్యాటర్‌ కూడా జాద్రానే. ఆడిన 9 మ్యాచ్‌ల్లో 47 సగటుతో 376 పరుగులు సాధించాడు.
5. అఫ్గానిస్థాన్‌ జట్టుకు చెందిన అజ్మతుల్లా ఒమర్‌జాయ్‌.. బ్యాటింగ్‌, బౌలింగ్‌ రెండింట్లోనూ అదరగొట్టాడు. భారత్‌పై 62 పరుగులు చేసిన ఈ యంగ్​ ప్లేయర్​.. శ్రీలంకపై జరిగిన మ్యాచ్​లో 73 పరుగుల అజేయ ఇన్నింగ్స్‌తో జట్టును విజయ పథంలో నడిపించాడు. దక్షిణాఫ్రికాతో ఆఖరి మ్యాచ్‌లోనూ అసాధారణంగా ఆడి.. అజేయంగా 97 పరుగులు చేశాడు. అంతే కాకుండా ఈ టోర్నీలో అజ్మతుల్లా 7 వికెట్లు కూడా తీశాడు.
6. సౌతాఫ్రికా ప్లేయర్​ కొయెట్జీ కూడా ఈ వరల్డ్​ కప్​లో ఆకట్టుకున్నాడు. 18 వికెట్లతో మెరిసిన ఈ స్టార్​ ప్లేయర్​​ను.. తన వేగం, దూకుడు చూసి స్టెయిన్‌తో పోలుస్తున్నారు విశ్లేషకులు. ఇక బ్యాటింగ్‌లోనూ రాణించాడు కొయెట్జీ.
7. పాకిస్థాన్‌ జట్టుకు చెందిన అబ్దుల్లా షఫీక్‌ కూడా తన ఫామ్​తో అందరి దృష్టినీ ఆకర్షించాడు. 7 మ్యాచ్‌ల్లో 48 సగటుతో 336 పరుగులు సాధించాడు. అందులో ఒక సెంచరీ, మూడు అర్ధసెంచరీలు ఉండటం విశేషం.