Women World Cup 2022: ఐసీసీ మహిళల వన్డే ప్రపంచకప్ నుంచి సెమీస్ చేరకుండానే నిష్క్రమించింది టీమ్ఇండియా. ఆదివారం చివరివరకు ఉత్కంఠగా జరిగిన లీగ్ ఆఖరి మ్యాచ్లో దక్షిణాఫ్రికా చేతిలో 3 వికెట్ల తేడాతో ఓడిపోయింది. 275 పరుగుల లక్ష్యంతో బరిలోకి దిగిన సఫారీ జట్టు.. 7 వికెట్లు కోల్పోయి మ్యాచ్ గెలిచింది. దీంతో ప్రపంచకప్ గెలవాలనే మిథాలీ సేన ఆశలు గల్లంతయ్యాయి.
టీమ్ఇండియా నిర్దేశించిన 275 పరుగుల లక్ష్యాంతో దక్షిణాఫ్రికా జట్టు బరిలోకి దిగింది. ఈ మ్యాచ్లో దక్షిణాఫ్రికా బ్యాటర్లు బాగా రాణించారు. లారా వోవార్డ్‌ (80), లారా గూడల్‌ (49), కెప్టెన్ సున్‌ లూస్‌ (22), మిగ్నాన్‌ డు ప్రీజ్‌ (52 నాటౌట్‌), మారిజాన్నె కాప్‌ (32) బాధ్యతాయుతంగా ఆడారు. ఆఖర్లో టీమ్ఇండియా బౌలర్లు కట్టుదిట్టంగా బంతులేసి ఓ దశలో విజయం సాధించేలా కనిపించింది. కాగా, చివరి ఓవర్‌లో దక్షిణాఫ్రికా.. విజయానికి 7 పరుగులు అవసరమైన స్థితిలో ఉత్కంఠ తారస్థాయికి చేరింది. తొలి బంతికి సింగిల్‌ సాధించిన దక్షిణాఫ్రికా.. రెండో బంతికి చెట్టీ (7) వికెట్‌ కోల్పోయింది. ఆమె రనౌటవ్వడం వల్ల సమీకరణం నాలుగు బంతుల్లో 5 పరుగులుగా మారింది. దీంతో క్రీజులో ఉన్న మిగ్నాన్‌, షబ్నిమ్‌ (2) సింగిల్స్‌పై దృష్టి పెట్టారు. ఈ క్రమంలో ఐదో బంతికి మిగ్నాన్‌ భారీ షాట్‌ ఆడి హర్మన్ప్రీత్ కౌర్‌ చేతికి చిక్కినా.. అది నోబాల్‌గా నమోదైంది. దీంతో సంబరాల్లో మునిగిన భారత్‌కు నిరాశ మిగిలింది. చివరి రెండు బంతులకు దక్షిణాఫ్రికా బ్యాటర్లు సింగిల్స్‌ తీయడంతో భారత్‌ ఓటమిపాలైంది.
అంతకముందు, టాస్ గెలిచి బ్యాటింగ్ ఎంచుకున్న టీమ్ఇండియా ఓపెనర్లు మంధాన, షెఫాలీ వర్మ శుభారంభాన్ని అందించారు. 15వ ఓవర్లలో షెఫాలీ ఔట్ కాగా ఆ తర్వాత క్రీజులోకి వచ్చిన యస్తికా భాటియా (2) కూడా వెంటనే పెవిలియన్ బాటపట్టింది. దీంతో స్కోరు బోర్డు నెమ్మదించింది. ఆ తర్వాత కెప్టెన్ మిథాలీతో కలిసి ఇన్నింగ్స్ను చక్కదిద్దింది మంధాన. ఆఖర్లో హర్మన్ప్రీత్ (48) కూడా మెరిసింది.
ఇదీ చూడండి: IPL 2022: టాస్ నెగ్గిన దిల్లీ.. ముంబయి బ్యాటింగ్
