Kieron Pollard retirement: విండీస్ విధ్వంసక వీరుడు కీరన్ పొలార్డ్.. అంతర్జాతీయ క్రికెట్కు వీడ్కోలు పలికాడు. విండీస్ పరిమిత ఓవర్ల జట్టు సారథిగా ఉన్న పొలార్డ్.. 15 ఏళ్లుగా దేశానికి ప్రాతినిధ్యం వహించినందుకు గర్వపడుతున్నానని చెప్పాడు. ఈ సందర్భంగా భావోద్వేగ సందేశం విడుదల చేశాడు. పదేళ్ల వయసు నుంచి విండీస్కు ప్రాతినిధ్యం వహించాలని కలలు కన్నానని.. ప్రతి మ్యాచ్ను మనస్ఫూర్తిగా ఆడానని చెప్పుకొచ్చాడు. విండీస్ జట్టుకు కెప్టెన్గా వ్యవహరించడం తన జీవితంలో మర్చిపోలేని అనుభూతి అని పేర్కొన్నాడు. అంతర్జాతీయ మ్యాచ్లకు దూరమవుతున్నప్పటికీ.. టీ20, టీ10 లీగ్లకు అందుబాటులో ఉంటానని స్పష్టం చేశారు.
'అందరు యువకుల్లాగే విండీస్కు ప్రాతినిధ్యం వహించాలన్నది నాకూ ఓ కలే. నా చిన్ననాటి హీరో బ్రయన్ లారా నేతృత్వంలో 2007లో అంతర్జాతీయ క్రికెట్లోకి అరంగేట్రం చేయడం ఇప్పటికీ నాకు గుర్తుంది. మెరూన్ జెర్సీలో అలాంటి దిగ్గజాలతో కలిసి ఆడటం నాకు గౌరవం. విండీస్ తరఫున ఆడిన ఏ మ్యాచ్నూ తేలికగా తీసుకోలేదు. బ్యాటింగ్, బౌలింగ్, ఫీల్డింగ్ చేసేటప్పుడు నా మనస్ఫూర్తిగా ఆడాను. 2019లో పరిమిత ఓవర్ల కెప్టెన్సీ అప్పగించినప్పుడు చాలా గౌరవంగా భావించా. విలువల విషయంలో రాజీ పడకుండా సారథ్య బాధ్యతలను నిర్వర్తించానని భావిస్తున్నా' అని ఇన్స్టాగ్రామ్ పోస్ట్లో పొలార్డ్ పేర్కొన్నాడు.
పరిమిత ఓవర్ల క్రికెట్లో విధ్వంసక బ్యాటర్గా పేరు తెచ్చుకున్నాడు పొలార్డ్. బౌలింగ్, ఫీల్డింగ్లలో అతడి మెరుపులు కనిపించేవి. అయితే, అతడి అంతర్జాతీయ గణాంకాలు మాత్రం అంతగా ఆకట్టుకునేలా లేవు. 123 వన్డేలు ఆడిన పొలార్డ్.. 26 సగటుతో 2706 పరుగులు చేశాడు. 101 అంతర్జాతీయ టీ20లలో 1569 రన్స్ చేశాడు. వన్డేలలో 55, టీ20లలో 42 వికెట్లు పడగొట్టాడు. కెరీర్లో ఒక్క టెస్టు మ్యాచ్ కూడా ఆడలేదు. ఐపీఎల్లో ముంబయి ఇండియన్స్ జట్టుకు ప్రాతినిధ్యం వహిస్తున్నాడు.
ఇదీ చదవండి: రష్యాకు వింబుల్డన్ షాక్.. ఆటగాళ్లు పాల్గొనకుండా నిషేధం
