శ్రీలంక పర్యటనలో విఫలమైన మనీశ్ పాండే, హర్దిక్ పాండ్యపై విరుచుకుపడ్డాడు మాజీ డాషింగ్ ఓపెనర్ వీరేంద్ర సెహ్వాగ్. వీరిద్దరు వన్డేల్లో తనను తీవ్రంగా నిరాశపరిచారని పేర్కొన్నాడు. ఇక మనీశ్ పాండే విషయానికొస్తే.. అతడికి భవిష్యత్తులో జట్టులో చోటు ఉండకపోవచ్చని అభిప్రాయపడ్డాడు.
ప్రస్తుత లంక టూర్లో మూడు మ్యాచ్ల్లోనూ ఆడిన మనీశ్.. కేవలం 74 పరుగులే చేశాడు. జట్టులో స్థానం కోసం ఎందరో యువ క్రికెటర్లు పోటీపడుతున్న నేపథ్యంలో అతడిపై ఒత్తిడి మరింత పెరుగుతుందని సెహ్వాగ్ అన్నాడు.
"మనీశ్తో పాటు హర్దిక్ పాండ్య కూడా సరిగా ఆడలేకపోయాడు. అయితే ఈ సిరీస్లో రాణించే అద్భుత అవకాశం ఎవరికైనా వచ్చిందా అంటే అది మనీశ్కే అని చెప్పాలి. మూడు మ్యాచ్ల్లోనూ పెద్ద స్కోర్లు చేసే వీలున్నప్పటికీ.. తనను తాను నిరూపించుకోలేకపోయాడు. ఇకపై జట్టులో స్థానం దక్కే అవకాశం కష్టమే," అని సెహ్వాగ్ పేర్కొన్నాడు.
లంక టూర్కు యువ క్రికెటర్లతో బయల్దేరిన టీమ్ఇండియా అంచనా మేరకు రాణించింది. వన్డే సిరీస్ను 2-1 తేడాతో గెలుపొందింది. మనీశ్ మినహా.. కుర్రాళ్లు కూడా వచ్చిన అవకాశాలను సద్వినియోగం చేసుకున్నారు. సూర్యకుమార్, ఇషాన్ కిషన్.. అద్భుత బ్యాటింగ్తో ఆకట్టుకున్నారు. సూర్యకుమార్ అయితే మ్యాన్ ఆఫ్ ది సిరీస్గా నిలిచాడు. దీపక్ చాహర్ అటు బ్యాటింగ్తో పాటు బౌలింగ్లోనూ రాణించాడు.
ఇదీ చదవండి: వరల్డ్కప్ సూపర్ లీగ్లో దూసుకెళ్లిన టీమ్ఇండియా
