మోడ్రన్ క్రికెట్లో టీమ్ఇండియా మాజీ కెప్టెన్ మహేంద్ర సింగ్ ధోనీ- దక్షిణాఫ్రికా మాజీ ప్లేయర్ ఏబీ డివిలియర్స్ అంటే తెలియని క్రికెట్ ప్రేమికులు ఉండరు. భారత క్రికెట్ జట్టుకు మూడు ఐసీసీ ట్రోఫీలను అందించిన ఘనత మహీదైతే.. తన బ్యాటింగ్ స్కిల్స్తో క్రికెట్ ప్రేక్షకులను ఆకట్టుకున్న క్రికెటర్ డివిలియర్స్. వీరిద్దరు.. చాలా మందిపై తమ ప్రభావం చూపారు. అయితే ఈ ఇద్దరితోనూ టీమ్ఇండియా స్టార్ బ్యాటర్, ఛేజ్ మాస్టర్ విరాట్ కోహ్లీకి మంచి సత్సంబంధాలు ఉన్నాయి.
టీమ్ఇండియా ధోనీ-కోహ్లీల బంధం ఎంతో ప్రత్యేకం. మహీని.. విరాట్ కోహ్లీ ఓ గురువుగా భావిస్తాడు. ఈ విషయాన్ని ఇప్పటికే సందర్భం దొరికిన ప్రతీసారి విరాట్ బహిరంగంగానే చెప్పాడు. ఎన్నో సార్లు తనకు అండగా నిలిచాడని చెప్పుకొచ్చాడు. ఇక కోహ్లీ-డివిలియర్స్ల మధ్య ఉన్న స్నేహబంధం అందరికీ తెలిసిందే. ఇండియన్ ప్రీమియర్ లీగ్లో రాయల్ ఛాలెంజర్స్ బెంగళూరు తరఫున ఆడే వీరిద్దరూ.. తమ బ్యాటింగ్తో అభిమానులను ఎంతగానో అలరించారు. ఇద్దరు కలిసి ఎంతో సరదాగా కలిసి ఉంటారు.
మరి ధోనీ-డివిలియర్స్.. వీరిద్దరిలో ఎవరంటే ఛేజింగ్ మాస్టర్ కోహ్లీకి బాగా ఇష్టమో తెలుసా? తాజాగా ఈ ప్రశ్నే విరాట్కు ఎదురైంది. ఐపీఎల్ టెలివిజన్ బ్రాడ్కాస్టర్ స్టార్ స్పోర్ట్స్లో వచ్చిన ఓ టీవీ షోలో కోహ్లీని ఈ ప్రశ్న అడిగారు. 'ఎంఎస్‌డీ-డివిలియర్స్'.. ఈ ఇద్దరిలో మీ ఫేవరేట్ క్రికెటర్ ఎవరు? అని అడగగా.. విరాట్ ముందు నవ్వి ఆ తర్వాత ఇంటెలిజెంట్గా బదులిచ్చాడు. తనకు ఇద్దరూ ఇష్టమేనని తెలిపాడు. దీనికి సంబంధించిన వీడియో సోషల్ మీడియాలో రాగా, క్రికెట్ ఫ్యాన్స్ షేర్ చేస్తున్నారు. దీంతో అది ట్రెండ్ అవుతోంది.
ఇంకా ఈ వీడియోలో విరాట్ తన ఇష్టాలేంటో చెప్పుకొచ్చాడు. తనకు ఫ్లిక్ షాట్ కన్నా కవర్ డ్రైవ్ అంటే ఇష్టమని అన్నాడు. అడిలైడ్ ఓవల్లో చిరస్మరణీయ ఇన్నింగ్స్లు ఆడినా చిన్నస్వామి స్టేడియం అంటేనే ఎక్కువ ఇష్టమని వెల్లడించాడు. చాహల్ గేల్లో ఎవరు ఎక్కువగా నవ్వించే క్రికెటర్ అని అడగగా.. గేల్ అని సమాధానమిచ్చాడు. స్టార్ సింగర్స్ పంజాబ్ సింగర్ గురుదాస్ మన్ - అర్జిత్ సింగ్.. ఇద్దరిలో ఒకరిని ఎంచుకోమనగా.. 'ఇది చాలా టఫ్' అని చెప్పాడు. మళ్లీ అర్జిత్ సింగ్ సాంగ్స్ అంటే ఇష్టమని కూడా తెలిపాడు. జిమ్లో కార్డియో కన్నా వెయిట్ ట్రైనింగ్ వర్కౌట్ అంటేనే ఇష్టమని చెప్పుకొచ్చాడు.
ఇదీ చూడండి: IPL 2023: ఆర్సీబీ చెత్త రికార్డు.. విరాట్తో కలిసి స్టెప్పులేసిన షారుక్ ఖాన్
