Virat Kohli on AB de Villiers: రాయల్ ఛాలెంజర్స్ బెంగళూరు ఐపీఎల్ కప్పు గెలిస్తే ఏబీ డివిలియర్స్ చాలా సంతోషిస్తాడని ఆ జట్టు మాజీ సారథి విరాట్ కోహ్లీ అన్నాడు. టైటిల్ గెలిచిన తర్వాత తనకు తొలుత గుర్తొచ్చేది డివిలియర్సే అని చెప్పుకొచ్చాడు. అతడు ప్రత్యేకమైన వ్యక్తి అని కోహ్లీ అన్నాడు. డివిలియర్స్ ఆటకు వీడ్కోలు పలికిన క్షణాలను కోహ్లీ గుర్తు చేసుకున్నాడు.
RCB IPL 2022: "వచ్చే సీజన్లలో మేం టైటిల్ గెలవగలిగితే.. నాకు ముందుగా డివిలియర్సే గుర్తొస్తాడు. మేం కప్పు గెలిస్తే.. అతడికి చాలా గొప్ప అనుభూతి కలుగుతుంది. అతడు రిటైర్మెంట్ ప్రకటించినప్పుడు నాకు వింతగా అనిపించింది. ఆరోజు నాకు ఇప్పటికీ గుర్తుంది. ప్రపంచకప్ తర్వాత మేం ఇంటికి తిరిగి వస్తున్న సమయంలో నాకు డివిలియర్స్ ఓ వాయిస్ నోట్ పంపాడు. అయితే, డివిలియర్స్ ఈ నిర్ణయం తీసుకుంటాడనే సందేహం నాకు గత సీజన్‌లోనే అనిపించింది. అప్పుడు నాతో మాట్లాడుతూ 'నీతో కలిసి కాఫీ తాగాలి. చాలా మాట్లాడాలి' అని చెప్పేవాడు. నాకు ఏదోలా అనిపించి నేను కాఫీకి రానని చెప్పేశా. అప్పుడే తన విషయంలో ఏదో జరుగుతుందని గ్రహించా" అని కోహ్లీ చెప్పుకొచ్చాడు.
డివిలియర్స్ అంతకుముందెన్నడూ అలా మాట్లాడలేదని.. మాజీ సారథి వివరించాడు. 'ఆ వాయిస్ మెసేజ్‌ వినగానే నేనూ భావోద్వేగానికి గురయ్యా. అతడితో ఎన్నో మధుర జ్ఞాపకాలు పంచుకున్నాను. అయితే, మొన్ననే.. డివిలియర్స్ గురించి ఆలోచిస్తూ.. ఇకపై మేం ఎప్పుడు కప్పు గెలిచినా.. మొదట తననే గుర్తుచేసుకోవాలనుకున్నా. బెంగళూరు కప్పు గెలవడం డివిలియర్స్‌కు ఎంత ఇష్టమో నాకు తెలుసు. అతడో అద్భుతమైన వ్యక్తి. బెంగళూరు ఫ్రాంఛైజీలో ప్రతి ఒక్కరి మనసును స్పృశించిన వ్యక్తి డివిలియర్స్' అని కోహ్లీ అన్నాడు. ఇక తాను ఎప్పటికీ ఆ జట్టుతోనే కొనసాగుతానని, ఎంత మంది ఆటగాళ్లు వచ్చిపోయినా ప్రతి ఒక్కరినీ తన కుటుంబ సభ్యుల్లాగే భావిస్తానని చెప్పాడు. ఇక్కడ లభించిన ప్రేమ, ఆప్యాయతలు ఎప్పటికీ తనతోనే ఉంటాయన్నాడు.
ఇదీ చదవండి: 'ఆర్సీబీ నన్ను అడగలేదు.. వైదొలిగాక కోహ్లీ అలా అన్నాడు'
