భారత్, ఇంగ్లాండ్ మధ్య 5 టెస్టుల సిరీస్ ఆగస్టు 4 నుంచి ప్రారంభం కానుంది. ఇరుజట్లు పోటీ పడిన పలు సిరీస్లలో ఆతిథ్యజట్టుదే పైచేయి. ఈసారి మాత్రం ఆ సంప్రదాయం మారుతుందని భారత ఆటగాళ్లు ఆత్మవిశ్వాసంతో ఉన్నారు. అయితే ఈ టెస్టు మ్యాచ్ల సిరీస్లో టీమ్ఇండియా క్రికెటర్లు కొన్ని ఘనతలు సాధించేందుకు సిద్ధంగా ఉన్నారు. వారెవరు? ఆ క్రికెటర్లు సాధించే మైలురాళ్లు ఏవో తెలుసుకుందాం.
ఇంగ్లాండ్తో సిరీస్లో టీమ్ఇండియా ఆటగాళ్లు సాధించనున్న రికార్డుల వివరాలు..
విరాట్ కోహ్లీ
- కోహ్లీ మరో 453 పరుగులు చేస్తే.. టెస్టుల్లో 8 వేల పరుగుల మైలురాయిని చేరుకుంటాడు.
- అంతర్జాతీయ క్రికెట్లో ఇప్పటివరకు 70 శతకాలు చేసిన కోహ్లీ.. చివరగా 2019లో బంగ్లాదేశ్పై టెస్టు సెంచరీ చేశాడు. ఆస్ట్రేలియా మాజీ కెప్టెన్ రికీ పాంటింగ్ 70 శతకాలు రికార్డును అధిగమించి.. సచిన్ తెందూల్కర్ తర్వాత రెండో స్థానంలో నిలిచే అవకాశం కోహ్లీకి ఈ సిరీస్లో ఉంది.
- ఇంగ్లాండ్తో కోహ్లీ ఆడిన 23 టెస్టుల్లో ఇప్పటివరకు 1742 పరుగులు చేశాడు. ప్రస్తుత సిరీస్లో మరో 258 పరుగులు చేస్తే.. ఆ జట్టుపై 2 వేల పరుగులు చేసిన క్రికెటర్గా రాహుల్ ద్రవిడ్ సరసన చేరుతాడు.
- టీమ్ఇండియా మాజీ క్రికెటర్లు సచిన్ తెందూల్కర్, రాహుల్ ద్రవిడ్.. ఇంగ్లాండ్ జట్టుపై తలో ఏడు సెంచరీలు చేశారు. కోహ్లీ ఇప్పటికే ఆ జట్టుపై 5 శతకాలు కొట్టగా, ఇంగ్లాండ్పై ఎక్కువ సెంచరీలు చేసిన భారత బ్యాట్స్మన్గా నిలిచేందుకు కోహ్లీకి అవకాశం ఉంది.
- టెస్టుల్లో కోహ్లీ ఇప్పటివరకు 90 క్యాచ్లు పట్టాడు. ఇంగ్లాండ్తో టెస్టు సిరీస్లో అది 100కు చేరే అవకాశం ఉంది.
అజింక్య రహానె
- 74 టెస్టుల్లో ఆడిన టీమ్ఇండియా వైస్కెప్టెన్ అజింక్య రహానె.. ఇప్పటివరకు 4647 రన్స్ చేశాడు. మరో 353 పరుగులు చేస్తే టెస్టుల్లో 5 వేల పరుగుల మైలురాయిని అందుకుంటాడు.
- టెస్టుల్లో 96 క్యాచ్లు పట్టిన రహానె.. ఈ సిరీస్తో 100 మార్క్ను అందుకునే అవకాశం ఉంది.
రోహిత్ శర్మ
- టీమ్ఇండియా బ్యాట్స్మన్ రోహిత్ శర్మ టెస్టుల్లో ఇప్పటివరకు 2,679 పరుగులు చేయగా.. మరో 321 రన్స్ నమోదు చేస్తే 3 వేల పరుగులు మైలురాయిని చేరుకుంటాడు.
జస్ప్రీత్ బుమ్రా
- టెస్టుల్లో ఇప్పటివరకు 83 వికెట్లు(20 టెస్టుల్లో) తీసిన పేసర్ బుమ్రా.. 100 వికెట్ల మైలురాయికి చేరుకునేందుకు మరెంతో దూరం లేదు. ఇదే సిరీస్లో బుమ్రా ఆ ఘనత సాధిస్తే.. అత్యంత వేగంగా ఈ ఘనత సాధించిన భారత పేసర్గా బుమ్రా రికార్డు సృష్టిస్తాడు. ఈ రికార్డు ఇప్పుడు భారత లెజండరీ కెప్టెన్ కపిల్ దేవ్(25 టెస్టులు) పేరిట ఉంది.
రవిచంద్రన్ అశ్విన్
- ఇంగ్లాండ్ జట్టుపై ఈ సిరీస్తో రవిచంద్రన్ అశ్విన్ మరో 12 వికెట్లు సాధిస్తే.. ఆ జట్టుపై 100 వికెట్లు సాధించిన తొలి భారత బౌలర్గా రికార్డు నెలకొల్పుతాడు.
రవీంద్ర జడేజా
- టెస్టుల్లో 2 వేల పరుగుల మైలురాయిని చేరుకునేందుకు టీమ్ఇండియా ఆల్రౌండర్ రవీంద్ర జడేజా మరో 15 రన్స్ కావాలి.
మహమ్మద్ షమి
- టెస్టుల్లో 200 వికెట్లు ఘనత సాధించేందుకు.. షమి మరో 16 వికెట్లు పడగొట్టాల్సి ఉంది.
ఇంగ్లాండ్ క్రికెటర్లూ..
వీరితో పాటు ఈ సిరీస్లో ఇంగ్లాండ్ క్రికెటర్లు రికార్డులను నమోదు చేసే అవకాశం ఉంది. ఇంగ్లాండ్ కెప్టెన్ జో రూట్.. టెస్టుల్లో 9 వేల పరుగుల మైలురాయిని చేరుకోవాలంటే మరో 286 రన్స్ చేయాలి. ఇంగ్లీష్ బౌలర్ స్టువర్ట్ బ్రాడ్ టెస్టుల్లో 150 వికెట్లు మైలురాయిని చేరుకునేందుకు మరో 2 వికెట్ల దూరంలోనే ఉన్నాడు.
ఇదీ చూడండి.. పొట్టి ప్రపంచకప్లో టీమ్ఇండియా జట్టు ఇదేనా!
