Under-19 Asia Cup: ఆంధ్రప్రదేశ్‌ కుర్రాడు షేక్ రషీద్ (90 నాటౌట్‌; 108 బంతుల్లో 3×4, 1×6) సత్తా చాటడం వల్ల అండర్-19 ఆసియాకప్‌ క్రికెట్‌ టోర్నీలో భారత్ ఫైనల్కు దూసుకెళ్లింది. గురువారం జరిగిన సెమీఫైనల్‌ భారత్ 103 పరుగుల తేడాతో బంగ్లాదేశ్‌ను చిత్తు చేసింది.
మొదట బ్యాటింగ్‌ చేసిన భారత్ 50 ఓవర్లలో 8 వికెట్లకు 243 పరుగులు చేసింది. 62 పరుగులకే 3 వికెట్లు కోల్పోయిన స్థితిలో కెప్టెన్‌ యశ్‌ ధూల్‌ (26)తో కలిసి రషీద్ ఇన్నింగ్స్‌ నిర్మించాడు. యశ్‌తో కలిసి నాలుగో వికెట్‌కు 41 పరుగులు జత చేసిన రషీద్.. ఆ తర్వాత రాజ్‌ (23), విక్కీ (28 నాటౌట్‌)తో కలిసి విలువైన భాగస్వామ్యాలు నెలకొల్పి జట్టుకు పోరాడే స్కోరు అందించాడు. బంగ్లా బౌలర్లలో రకిబుల్‌ (3/41) రాణించాడు. ఛేదనలో రవికుమార్‌ (2/22), విక్కీ (2/25), రాజ్‌ (2/26), రాజ్‌వర్దన్‌ (2/36) విజృంభించడం వల్ల బంగ్లా 38.2 ఓవర్లలో 140 పరుగులకే ఆలౌటైంది. అరిఫుల్‌ ఇస్లాం (42) టాప్‌ స్కోరర్‌. తుది సమరంలో శ్రీలంకతో భారత్ తలపడనుంది. మరో సెమీస్లో లంక 22 పరుగుల తేడాతో పాకిస్థాన్‌ను ఓడించింది.
