ప్రపంచ టెస్టు ఛాంపియన్షిప్ ఫైనల్, ఇంగ్లాండ్ సిరీస్ కోసం టీమ్ఇండియా ఆటగాళ్లు ముంబయిలో ప్రత్యేకంగా ఏర్పాటుచేసిన బయోబుడగలోకి వెళ్లిపోయారు. వీరిలో ముంబయి మినహా ఇతర నగర క్రికెటర్లు మే 19నుంచే 14రోజులు నిర్బంధంలోకి వెళ్లగా.. సోమవారం ముంబయికి చెందిన కోహ్లీ సహా మిగతా ఆటగాళ్లు ఏడు రోజుల క్వారంటైన్లోకి అడుగుపెట్టారు. అయితే వీరందరి కోసం ఇక్కడి నుంచి ఇంగ్లాండ్ పర్యటనకు వెళ్లేవరకు ప్రత్యేకమైన ఏర్పాట్లు చేసినట్లు ఓ బీసీసీఐ అధికారి తెలిపారు.
"సోమవారం బయోబబుల్లోకి వెళ్లిన కోహ్లీ సహా మిగతా ఆటగాళ్లు.. అంతకుముందే బుడగలోకి వెళ్లిన ప్లేయర్స్తో కలవరు. వారు ఏడురోజుల పాటు విడిగా క్వారంటైన్లో ఉండి, ఇంగ్లాండ్ వెళ్లేముందు జట్టుతో కలుస్తారు. అప్పటివారకు వారికి కావాల్సిన సౌకర్యాలన్నింటినీ వారి గద్దుల్లోనే ఏర్పాటు చేశాం. ముఖ్యంగా వారి ఫిట్నెస్ను దృష్టిలో ఉంచుకుని ప్రతిరూమ్లో వర్కౌట్లు, శిక్షణకు సంబంధించిన జిమ్ పరికరాలను అందుబాటులో ఉంచాం. ప్రతిరోజు వారికి కొవిడ్ పరీక్షలు చేయనున్నాం. ఇందులో ఎటువంటి అలసత్వం ప్రదర్శించడం లేదు. ఇంగ్లాండ్ వెళ్లాక కూడా అక్కడ క్వారంటైన్లో ఉంటారు. ఆ తర్వాతే మైదానంలోకి దిగుతారు. అక్కడే కరోనా టీకా రెండో డోసు కూడా తీసుకుంటారు.
-బీసీసీఐ అధికారి.
ఈ సిరీస్ కోసం జూన్ 2న ఇంగ్లాండ్ బయలుదేరనుంది టీమ్ఇండియా. అక్కడికి చేరుకున్నాక మరో 10 రోజులు సౌథాంప్టన్లో క్వారంటైన్కు వెళ్లనున్నారు. జూన్ 18-22వరకు ఛాంపియన్షిప్ ఫైనల్, ఆగస్టు 4 నుంచి సెప్టెంబరు 14వరకు ఇంగ్లాండ్తో టెస్ట్ సిరీస్ జరగనుంది.
ఇదీ చూడండి డబ్ల్యూటీసీ ఫైనల్ కోసం ప్రేక్షకులకు అనుమతి
