Sunil Gavaskar Mumbai plot: మూడు దశాబ్దాల క్రితం మహారాష్ట్ర ప్రభుత్వం కేటాయించిన ప్లాట్ను టీమ్ఇండియా మాజీ కెప్టెన్ సునీల్ గావస్కర్ తిరిగి ఇచ్చేశారు. క్రికెట్ అకాడమీ నెలకొల్పేందుకు మహారాష్ట్ర హౌజింగ్ ఏజెన్సీ(ఎంహెచ్ఏడీఏ) ముంబయిలోని బాంద్రాలో 33 ఏళ్ల క్రితం ఈ స్థలాన్ని కేటాయించింది. అప్పటి నుంచి ఇది నిరుపయోగంగానే ఉంది. ఈ నేపథ్యంలో మహారాష్ట్ర హౌజింగ్ మినిస్టర్ జితేంద్ర అవ్హాద్.. గతేడాది సునీల్ గావస్కర్కు లేఖ రాశారు. బాంద్రాలో కేటాయించిన ప్లాట్ నిరుపయోగంగా పడి ఉండటంపై అసంతృప్తి వ్యక్తం చేశారు. ఆ ప్లాట్ను తిరిగి ఇచ్చేయాలని విజ్ఞప్తి చేశారు.
Sunil Gavaskar cricket academy: అయితే, క్రికెట్ అకాడమీ నెలకొల్పాలని సునీల్ గావస్కర్ ఇదివరకే పలు ప్రయత్నాలు చేశారు. సచిన్ తెందూల్కర్తో కలిసి అకాడమీ అభివృద్ధి కోసం ఓ ప్లాన్ను రూపొందించారు. ఈ మేరకు ఠాక్రే ప్రభుత్వంతో చర్చలు జరిపారు. దురదృష్టవశాత్తు అవేవీ ఫలించలేదు. ఈ నేపథ్యంలోనే గావస్కర్కు మంత్రి జితేంద్ర లేఖ రాశారు. ఎనిమిది నెలల చర్చల అనంతరం ప్లాట్ను తిరిగి ఇచ్చేస్తున్నట్లు బ్యాటింగ్ దిగ్గజం సునీల్ గావస్కర్ ప్రకటించారు. ఈ మేరకు ముఖ్యమంత్రి ఉద్ధవ్ ఠాక్రేకు లేఖ రాశారు. తాను క్రికెట్ అకాడమీ ఏర్పాటు చేయలేనని లేఖలో స్పష్టం చేశారు.
ఇదీ చదవండి: ఐసీసీ ర్యాంకింగ్స్.. టీ20ల్లో మనమే టాప్.. టెస్టులు, వన్డేల్లో ఇలా..
