వరల్డ్ టెస్ట్ ఛాంపియన్‌షిప్ ఫైనల్, ఇండియన్ ప్రీమియర్ లీగ్ (ఐపీఎల్) 2023 సీజన్ ముందు అటు టీమ్ఇండియాకు, ఇటు కోల్‌కతా నైట్ రైడర్స్‌కు భారీ ఎదురుదెబ్బ తగిలింది. అనుకున్నట్టే వెన్ను గాయం కారణంగా కేకేఆర్ కెప్టెన్, టీమ్ఇండియా స్టార్ ప్లేయర్ శ్రేయస్ అయ్యర్ ఐపీఎల్ తాజా సీజన్కు దూరం అయ్యాడు. అయ్యర్‌కు శస్త్రచికిత్స జరగాల్సి ఉన్న కారణంగా ఈ మెగాటోర్నీ ఆడడం లేదు. దీంతోపాటే ప్రపంచ టెస్ట్ ఛాంపియన్‌షిప్ ఫైనల్ 2023కు కూడా అందుబాటులో ఉండట్లేదు. ఈ విషయాన్ని ఓ నేషనల్ మీడియా తెలిపింది.
ప్రస్తుతం బీసీసీఐ వైద్యుల పర్యవేక్షణలో శ్రేయస్ అయ్యర్ ఉన్నాడట. శస్త్రచికిత్స అనంతరం అతడు కోలుకోవడానికి 4-5 నెలల సమయం పట్టే అవకాశముంది. ఈ గాయానికి అయ్యర్ లండన్‌లో గానీ లేదా మరో చోట గానీ సర్జరీ చేయించుకోనున్నాడని వార్తలు వస్తున్నాయి. ఈ కారణంగానే మార్చి 31న ప్రారంభం కానున్న ఐపీఎల్ 2023, వరల్డ్ టెస్ట్ ఛాంపియన్‌షిప్ ఫైనల్ 2023కు అయ్యర్ దూరం కావాల్సి వచ్చింది. అంతేకాకుండా ఈ ఏడాది భారత వేదికగా జరిగే వన్డే ప్రపంచకప్ 2023కు దూరమయ్యే అవకాశాలు కనిపిస్తున్నాయి. చూడాలి మరి ఏం జరుగుతుందో..
కాగా, వెన్ను సమస్య కారణంగానే న్యూజిలాండ్‌తో జరిగిన వన్డే సిరీస్‌లో శ్రేయస్ బరిలోకి దిగలేదు. ఇటీవల ఆస్ట్రేలియాతో ముగిసిన టెస్ట్ సిరీస్లోనూ.. తొలి మ్యాచ్లో అయ్యర్ ఆడలేదు. అయితే రెండు, మూడు టెస్టుల్లో మాత్రం బ్యాటింగ్ చేశాడు. అయితే వెన్ను నొప్పి బాధిస్తుండడం వల్ల నాలుగో మ్యాచ్లో బ్యాటింగ్ చేయలేదు. ఇక ఆస్ట్రేలియాతో జరుగుతున్న 3 మ్యాచ్‌ల వన్డే సిరీస్కు అతడికి చోటు దక్కింది. కానీ వెన్ను గాయం తగ్గకపోవడంతో సిరీస్ నుంచి తప్పుకున్నాడు. అయ్యర్ స్థానంలో సూర్యకుమార్ యాదవ్ బరిలోకి దిగాడు. కానీ సూర్య ఆశించిన స్థాయిలో ఆడలేకపోయాడు.
ఇకపోతే కోల్‌కతా నైట్ రైడర్స్‌ ఫ్రాంచైజీ శ్రేయస్ అయ్యను రూ. 12.25 కోట్లకు కొనుగోలు చేసింది. అతడిని కెప్టెన్గా కూడా నియమించింది. కానీ ఇప్పుడు అయ్యర్ వెన్ను గాయం కారణంగా కేకేఆర్కు కొత్త కెప్టెన్ను వెతుక్కోవాల్సిన పరిస్థితి ఏర్పడింది. కెప్టెన్ రేసులో ఈ మధ్యలో షకిబ్ అల్ హసన్, రింకూ సింగ్, ఆండ్రూ రసెల్ పేర్లు వినిపించాయి. దీనిపై అభిమానుల్లో తెగ ఆసక్తి నెలకొంది. ఇక వరల్డ్ టెస్ట్ ఛాంపియన్‌షిప్ ఫైనల్ విషయానికొస్తే.. అయ్యర్ స్థానంలో దేశవాళీ క్రికెట్ హీరో సర్ఫరాజ్ ఖాన్‌ను తీసుకునే అవకాశముంది.
ఇదీ చూడండి: నెం.1 ర్యాంకును కోల్పోయిన సిరాజ్.. గ్రౌండ్లోనే మండిపడ్డ రోహిత్, కోహ్లీ!
