ఆటకు వీడ్కోలు పలికినా.. తన యూట్యూబ్ ఛానల్ ద్వారా అప్పుడప్పుడు క్రికెట్పై తన అభిప్రాయాలను తెలియజేస్తున్నాడు పాకిస్థాన్ మాజీ బౌలర్ షోయబ్ అక్తర్. ఇటీవలే తన యూట్యూబ్ ఛానల్లో మాట్లాడుతూ.. ప్రపంచంలోని ఉత్తమ క్రికెటర్లతో ఓ వన్డే జట్టును ఎంపిక చేశాడు. అందులో నలుగురు పాక్ ఆటగాళ్లు ఉండగా.. నలుగురు భారత క్రికెటర్లకు జట్టులో స్థానం కల్పించాడు. అయితే ప్రస్తుతం పాకిస్థాన్, భారత్ జట్లకు కెప్టెన్లుగా వ్యవహరిస్తూ.. వన్డే ర్యాంకింగ్స్లో నెం.1,2 లుగా ఉన్న బాబర్ అజామ్, విరాట్ కోహ్లీలకు.. అక్తర్ తన జట్టులో స్థానం కల్పించలేదు.
తాను ఎంపిక చేసిన ఉత్తమ వన్డే జట్టులో గోర్డాన్ గ్రీనిడ్జ్(వెస్టిండీస్), సచిన్ తెందుల్కర్లను ఓపెనర్లుగా ఎంపిక చేయగా.. ఆ తర్వాత 3, 4వ స్థానాల్లో పాక్ మాజీ కెప్టెన్ ఇంజమామ్, మాజీ బ్యాట్స్మన్ సయీద్ అన్వర్లను తీసుకున్నాడు. అయితే వీరిద్దరిలో ఇంజమామ్ బ్యాటింగ్ స్థానం మారకపోయినా.. ఓపెనింగ్ బ్యాటింగ్ చేసే అన్వర్కు 4వ స్థానాన్ని కేటాయించాడు అక్తర్. సయీద్ అన్వర్ మిడిల్ ఆర్డర్లో బ్యాటింగ్ చేస్తే పరుగులు రాబట్టడం సహా బౌలర్లను దీటుగా అడ్డుకోగలడని అక్తర్ చెప్పాడు.
కెప్టెన్గా వార్న్..
ఈ జట్టుకు కెప్టెన్గా ఆస్ట్రేలియా బౌలర్ షేన్ వార్న్ను ఎంపికచేశాడు షోయబ్ అక్తర్. మరోవైపు భారత లెజండరీ ఆల్రౌండర్ కపిల్ దేవ్ను ఫాస్ట్ బౌలర్ జాబితాలో చేర్చాడు. టీమ్ఇండియా మాజీ కెప్టెన్ ఎం.ఎస్.ధోనీని వికెట్ కీపర్గా జట్టులోకి తీసుకున్నాడు. వీరితో పాటు 6వ స్థానంలో ఆడమ్ గిల్క్రిస్ట్, ఏడులో యువరాజ్ సింగ్కు చోటు కల్పించాడు.
షోయబ్ అక్తర్ ఎంపిక చేసిన ఆల్టైమ్ వన్డే టీమ్
గోర్డాన్ గ్రీనిడ్జ్, సచిన్ తెందుల్కర్, ఇంజమామ్-ఉల్-హక్, సయీద్ అన్వర్, ఎం.ఎస్.ధోనీ, ఆడమ్ గిల్క్రిస్ట్, యువరాజ్ సింగ్, వసీమ్ అక్రమ్, వకార్ యూనిస్, కపిల్ దేవ్, షేన్ వార్న్ (కెప్టెన్) .
ఇదీ చూడండి.. భారత క్రికెటర్లకు కెప్టెన్గా ఇమ్రాన్ఖాన్!
