Shane Warne Funeral: ఆస్ట్రేలియా దిగ్గజ క్రికెటర్ షేన్ వార్న్ వీడ్కోలు సభను మెల్బోర్న్ క్రికెట్ గ్రౌండ్(ఎంసీజీ)లో నిర్వహించనున్నారు. మార్చి 30న ఈ సభను ఏర్పాటు చేయనున్నట్లు విక్టోరియా స్టేట్ ప్రీమియర్ డేనియల్ ఆండ్రూస్ వెల్లడించారు. వార్న్ సంతాప సభకు ఎంసీజీ వేదిక సరైందన్నారు. ఎంసీజీ సభకు ముందే వార్న్ అంత్యక్రియలు ఉంటాయని కుటుంబ సభ్యులు ప్రకటించారు. "షేన్వార్న్ వీడ్కోలు సభకు ఎంసీజీ కన్నా సరైన స్థలం ప్రపంచంలో మరొకటి లేదు" అని ఆండ్రూస్ బుధవారం ట్వీట్ చేశారు.
మెల్బోర్న్ క్రికెట్ మైదానం వార్న్కు చాలా ప్రత్యేకమైనది. 1994లో ప్రతిష్ఠాత్మక యాషెస్ సిరీస్లో హ్యాట్రిక్, 2006లో బాక్సింగ్ డే రోజున తీసిన 700వ టెస్ట్ వికెట్, రిటైర్మెంట్కు ముందు చివరి అంతర్జాతీయ మ్యాచ్ ఇక్కడే ఆడాడు. వార్న్ మెల్బోర్న్లోనే పుట్టి పెరిగాడు.
52 ఏళ్ల షేన్ వార్న్ గుండెపోటుతో గతవారం థాయ్లాండ్లో మరణించాడు. వార్న్ శవపరీక్ష ఫలితాల్లో ఎలాంటి అనుమానస్పద ఆనవాళ్లు లేకపోవడం వల్ల సహజ మరణంగా నిర్థారించారు. వార్న్ భౌతికకాయాన్ని థాయ్లాండ్లోని కో సముయ్ ఐస్లాండ్ నుంచి సూరత్థానీ భూభాగానికి ఆదివారం తరలించారు. అక్కడ నుంచి సోమవారం రాత్రి థాయ్లాండ్ రాజధాని బ్యాంకాక్కు తీసుకెళ్లారు.
బ్యాంకాక్ నుంచి మెల్బోర్న్కు తరలించడానికి ఏర్పాట్లు జరుగుతున్నాయి. వార్న్ మరణించిన మార్చి 4 రాత్రిని 'ముగింపులేని ఓ పీడకలగా' అభివర్ణించింది వార్న్ కుటుంబం.
ఇదీ చదవండి: Test Rankings 2022: టెస్ట్ ర్యాంకింగ్స్లో అతడే నెం. 1
