టీమ్ఇండియా మాజీ సారథి ఎంఎస్ ధోనీ ధరించిన జెర్సీ-7కు వీడ్కోలు పలకాలని మాజీ క్రికెటర్ సాబా కరీమ్ అంటున్నారు. మరికొంత మంది దిగ్గజాలనూ అలాగే గౌరవించాలని సూచించారు. అంతర్జాతీయ క్రికెట్‌కు దూరమైనప్పటికీ మహీ.. యువకులకు మార్గనిర్దేశం చేయగలడని పేర్కొన్నారు.
"ధోనీ జెర్సీ మాత్రమే కాదు మరికొందరు భారత దిగ్గజాల జెర్సీలనూ బీసీసీఐ భద్రపరచాలి. వారు ధరించిన జెర్సీ నంబర్లను ఇతరులు వాడకుండా చూడాలి. భారత క్రికెట్‌ను ముందుకు తీసుకెళ్లిన దిగ్గజాలకు ఇదో గుర్తింపు. వారిని ఇలా గౌరవించొచ్చు"
-సాబా కరీమ్, మాజీ క్రికెటర్
ధోనీ అంతర్జాతీయ క్రికెట్‌ ఆడనప్పటికీ భారత కుర్రాళ్లకు అతడు దారిచూపే దీపం కాగలడని కరీమ్ అభిప్రాయపడ్డారు. 'అతడు భారత క్రికెట్‌కు సేవలు కొనసాగిస్తాడనే అనుకుంటున్నా. చెన్నై సూపర్‌కింగ్స్‌ తరఫున అతడెంతో మంది యువకులను తీర్చిదిద్దాడు. రాష్ట్ర స్థాయిలోనూ కుర్రాళ్లకు మార్గనిర్దేశం చేయాలి. అలాగైతే భారత క్రికెట్‌ భవిష్యత్తుకు మంచి జరుగుతుంది' అని సాబా కరీమ్ పేర్కొన్నారు.
ఇదీ చూడండి: MS Dhoni: అత్యుత్తమ సారథి.. రికార్డులకు 'వారధి' ధోనీ
