బోర్డర్-గవాస్కర్ ట్రోఫీలో భాగంగా అహ్మదాబాద్ వేదికగా భారత్-ఆసీస్ మధ్య జరిగిన ఆఖరి నాలుగో టెస్టు మ్యాచ్ డ్రాగా ముగిసింది. ఈ మ్యాచ్లో ఇరు జట్ల బ్యాటర్లు మెరుగ్గా రాణించారు. తమ బ్యాట్లకు పని చెప్పారు. దీంతో ఈ మ్యాచ్లో భారీ స్కోర్లు నమోదయ్యాయి. అయితే గత మూడు మ్యాచులలాగానే ఈ నాలుగో టెస్టులోనూ బౌలర్లు వికెట్లతో విజృంభిస్తారని క్రికెట్ అభిమానులు అనుకున్నారు. కానీ అలా అనుకున్నట్టు జరగలేదు. మూడు రోజుల ఆట పూర్తయ్యే సమయానికి ఈ మ్యాచ్ డ్రాగా ముగుస్తుందని దాదాపుగా అందరికి అర్థమైపోయింది. ఇలాంటి సమయాల్లో కెప్టెన్లు ప్రయోగాలు చేస్తుంటారు. అలానే టీమ్ఇండియా కెప్టెన్ రోహిత్ శర్మ.. చివరి రోజు ఆటలో ప్రయోగాలు చేశాడు.
అందులో భాగంగానే ఎప్పుడూ బ్యాటింగ్ చేసే పుజారాతో బౌలింగ్ చేయించాడు. అలాగే యంగ్ ప్లేయర్ శుభమన్ గిల్తో కూడా బంతిని వేయించాడు. అలా వీరిద్దరితో చెరో ఓవర్ వేయించాడు హిట్మ్యాన్. ఈ క్రమంలోనే ఒక ఓవర్ వేసిన పుజారా ఒక పరుగు ఇవ్వగా.. గిల్ కూడా ఒకటే రన్ ఇచ్చాడు. అయితే పుజారా బౌలింగ్ చేయడంపై సరదాగా స్పందించాడు టీమ్ఇండియా సీనియర్ స్పిన్నర్ రవిచంద్రన్ అశ్విన్.
పుజారా బౌలింగ్ చేస్తున్న ఫోటోను తన ట్విటర్ అకౌంట్లో పోస్ట్ చేస్తూ.. "నువ్వు బౌలింగ్ చేస్తే నేనేం చెయ్యాలి? బౌలింగ్ మానేయాలా?" అంటూ సరదాగా చమత్కరించాడు. వాస్తవానికి అశ్విన్ ఎప్పుడూ సోషల్మీడియాలో ఫుల్ యాక్టివ్గా ఉంటూ తనదైన స్టైల్లో మాట్లాడుతుంటాడు. చమత్కారాలు కూడా చేస్తుంటాడు. అలానే ఈ సారి కూడా చేశాడు. ప్రస్తుతం ఈ ట్వీట్పై క్రికెట్ అభిమానులు సరదా కామెంట్లు చేస్తున్నారు. ఫన్నీగా చేసిన ఈ ట్వీట్ వెంటనే వైరల్గా మారిపోయింది. ఇప్పటికే లక్షా 60 వేల మందికి పైగా ఈ ట్వీట్ను లైక్ చేశారు.
ఈ నేపథ్యంలో అశ్విని ట్వీట్కు పుజారా సైతం స్పందించాడు. తాను బౌలింగ్ చేయడం ఆ కోణంలో చూడొద్దని అర్థం వచ్చేలా ఓ ఫన్నీ ట్వీట్ చేశాడు. నాగ్పుర్ టెస్టులో అశ్విన్ వన్ డౌన్లో బ్యాటింగ్కు వెళ్లడాన్ని ప్రస్తావించాడు. 'వద్దు (బౌలింగ్ మానేయాలా అనే ప్రశ్నకు బదులుగా). నాగ్పుర్ టెస్టులో నువ్వు వన్ డౌన్లో వెళ్లినందుకు నేను ఇలా థ్యాంక్స్ చెబుతున్నా' అని పుజారా ట్వీట్ చేశాడు. సాధారణంగా టెస్టుల్లో పుజారా వన్ డౌన్లో బ్యాటింగ్ చేస్తాడన్న విషయం తెలిసిందే. తన స్థానంలో అశ్విన్ బ్యాటింగ్కు వెళ్లాడని పుజారా పరోక్షంగా గుర్తు చేశాడు. అందుకే థ్యాంక్స్ చెబుతున్నట్లు పేర్కొన్నాడు. కాగా, ఈ ట్వీట్కు అశ్విన్ మళ్లీ స్పందించాడు. 'నీ ఉద్దేశం బాగానే ఉంది' అంటూ ట్వీట్ చేశాడు. ఇక వీరిద్దరి సంభాషణ ఇప్పుడు ట్విట్టర్లో ఆసక్తికరంగా మారింది.
ఇదీ చూడండి: WPL 2023: మెరిసిన దిల్లీ బ్యాటర్లు.. బెంగళూరుకు మళ్లీ నిరాశే..
