Rahul Dravid: టీమ్ఇండియా ఓపెనర్ కేఎల్ రాహుల్ను చూస్తే మాజీ బ్యాటర్, ప్రస్తుత హెడ్ కోచ్ రాహుల్ ద్రవిడ్ గుర్తుకొస్తాడని చెప్పాడు మాజీ క్రికెటర్ మహ్మద్ కైఫ్. అందుకు చాలా కారణాలనే ప్రస్తావించాడు. కేఎల్ రాహుల్ బ్యాటింగ్ స్టైల్, స్లిప్లో నమ్మదగిన ఫీల్డర్, కాబోయే కెప్టెన్.. ఈ లక్షణాలన్నీ ద్రవిడ్ను తలపిస్తున్నాయని వివరించాడు. దక్షిణాఫ్రికాపై తొలి టెస్టులో అద్భుత శతకంతో జట్టుకు విజయాన్ని అందించిన కేఎల్పై కొద్దిరోజులుగా ప్రశంసల జల్లు కురుస్తుంది.
"కేఎల్ రాహుల్ను చూస్తే రాహుల్ ద్రవిడ్ గుర్తొస్తాడు. ఎప్పుడూ జట్టు కోసమే ఆడే నిస్వార్థమైన వ్యక్తి. అతడో ఓపెనర్, అదనపు వికెట్కీపర్, లోయరార్డర్ బ్యాట్స్మన్, నమ్మదగిన స్లిప్ ఫీల్డర్, ఆపదలో జట్టును ఆదుకునేవాడు, భవిష్యత్తులో కెప్టెన్ కావడానికి అర్హత కలిగినవాడు."
- మహ్మద్ కైఫ్, టీమ్ఇండియా మాజీ క్రికెటర్
దక్షిణాఫ్రికా పర్యటనలో అటు బ్యాటుతో ఇటు బంతితో అదరగొడుతోంది కోహ్లీసేన. తొలి టెస్టులో కేఎల్ రాహుల్ (123) సెంచరీతో తొలి ఇన్నింగ్స్లో 327 పరుగులు చేసింది టీమ్ఇండియా. అనంతరం మహ్మద్ షమీ 5 వికెట్లతో విజృంభించగా సఫారీ జట్టు 197 పరుగులకే పరిమితమైంది. రెండో ఇన్నింగ్స్లో భారత్-174, దక్షిణాఫ్రికా-191 చేశాయి. దీంతో 113 పరుగుల తేడాతో టీమ్ఇండియా ఘనవిజయం సాధించింది. రాహుల్ ప్లేయర్ ఆఫ్ ది మ్యాచ్గా నిలిచాడు.
ఇదీ చూడండి: తరచూ ఆ బంతులకే కోహ్లీ ఔట్.. గావస్కర్ ఏమన్నాడంటే!
